Azərbaycan və Litva gələcək əməkdaşlığın praktik istiqamətini müəyyən edən protokol imzalayacaq.

Fins.az bildirir ki, bunu Azərbaycanın xarici işlər naziri Ceyhun Bayramov Vilnüsdə litvalı həmkarı Qabrielius Landsbergislə brifinqdə deyib.

"Həmsədrləri olduğumuz iqtisadi əməkdaşlıq üzrə birgə Hökumətlərarası Komissiyanın 7-ci iclasını səbirsizliklə gözləyirik. Bu sessiyada mütləq ikitərəfli əməkdaşlığın gündəliyində duran bir sıra mühüm məsələləri müzakirə edəcəyik. Nəticə olaraq gələcək əməkdaşlığımızın praktik istiqamətlərini müəyyən edəcək və ölkələrimiz arasında iqtisadi, siyasi, mədəni, energetika, humanitar və sosial əlaqələrin daha da canlanmasına imkan yaradacaq protokol imzalamağı planlaşdırırıq", - o deyib.

C.Bayramov protokolun çoxplanlı əməkdaşlığın yol xəritəsi olaraq çıxış edəcəyinə ümid etdiyini bildirib.

"Parlament diplomatiyasının parlamentlər arasında əməkdaşlığın inkişafı və onların diplomatiyada iştirakının aktivləşməsinin qabaqcıl vasitəsi olaraq rolunu yüksək qiymətləndiririk. Ölkələrimiz arasında parlamentlərarası əməkdaşlığı genişləndirməyi mühüm hesab edirik. 2022-ci ilin fevralında Milli Məclisin spikeri Sahibə Qafarovanın Litvaya səfəri əlaqələrimizin parlament səviyyəsində inkişafına imkan yaratdı. Parlamentlərarası əməkdaşlığın möhkəmlənməsi məqsədilə hər iki ölkənin parlamentində fəaliyyət göstərən dostluq qruplarının sayını daha da artırmaq lazımdır", - deyə o əlavə edib.