FAO-nun Türkiyə və Azərbaycandakı Nümayəndəliyinin birgə fəaliyyəti çərçivəsində regional seminar baş tutub.
BMT-nin Ərzaq və Kənd Təsərrüfatı Təşkilatından (FAO) Fins.Az-a verilən məlumata görə, Təşkilatın Mərkəzi Asiya üzrə Subregional Ofisi, FAO-nun Türkiyə Nümayəndəliyi və Azərbaycandakı Nümayəndəliyinin birgə fəaliyyəti çərçivəsində 24 Yanvar tarixində Bakıda regional seminar baş tutub. Seminarda Azərbaycan, Qazaxıstan, Qırğızıstan, Tacikistan, Türkiyə, Türkmənistan və Özbəkistandan rəsmi şəxslər bir araya gəlib.
Tədbir zamanı sessiyalarda kənd təsərrüfatı, meşə təsərrüfatı, təbii sərvətlər, səhralaşma, ərzaq təhlükəsizliyi və yoxsulluğun azaldılmasına dair birgə fəaliyyətlər müzakirə olunub. Seminarda, FAO-Türkiyə Tərəfdaşlıq Proqramının həyata keçirildiyi benefisiar ölkələrdəki kənd təsərrüfatı, qida və təbii ehtiyatların idarə edilməsi sahələrində mövcud məsələlərə toxunulub.
Türkiyə ilə BMT-nin Ərzaq və Kənd Təsərrüfat Təşkilatının (FAO) uzunmüddətli tərəfdaşlığı nəticəsində Mərkəzi Asiya və Qafqazda olan benefisiar ölkələr kənd təsərrüfatının, qida və təbii ehtiyatların düzgün idarə edilməsinə dair böyük töhvələr əldə edib. Qeyd edək ki, Proqram çəçivəsində regionda yer alan ölkələrlə yanaşı Azərbaycanda da bir neçə layihə həyata keçirilir. Bu günə qədər proqramın əhatə dairəsi yeni ölkələrin iştirakı və yeni mövzuların daxil edilməsi ilə Türkiyənin Proqrama ümumi töhfəsi 30 milyon ABŞ dollarına çatıb. Hazırda proqram iki moduldan ibarətdir: FAO-Türkiyə Ərzaq və Kənd Təsərrüfatı üzrə Tərəfdaşlıq Proqramı və FAO-Türkiyə Meşə Tərəfdaşlığı Proqramı. Proqrama balıqçılıq, meşə təsərrüfatı, ərzaq təhlükəsizliyi, qida təhlükəsizliyi, ərzaq itkisi və tullantıları və digər geniş mövzuları əhatə edən 19 layihə daxildir.
Seminarın əsas məqsədi tərəfdaş ölkələr və müxtəlif müvafiq auditoriyalar arasında proqramlar çərçivəsindəki layihələr haqqında məlumatlılığın artırılması olub. Seminar məruzəçiləri, mütəxəssisləri və iştirakçıları proqram çərçivəsində həyata keçirilən layihələrin məqsədlərini, fəaliyyətlərini və nailiyyətlərinin müzakirəsi üçün bir araya gətirib. Seminarda proqramların cari fəaliyyətinə nəzər yetirmək və təcrübələrin müzakirəsi ilə yanaşı növbəti atılacaq addımlar da müzakirə mövzusu olub.
Açılış sessiyasında çıxışçılar benefisiar ölkələrdə proqramın qida və kənd təsərrüfatı sektorlarının inkişafındakı rolunu vurğuladılar. Bundan əlavə, Türkiyə hökümətinin layihələrə verdiyi töhfələrə görə minnətdarlıqlarını ifadə etdilər.
Seminarın ilk sessiyasında FAO-nun Türkiyə və Azərbaycan Nümayəndələrinin rəhbər müavinləri ölkələrdə qida sistemləri, təbii ehtiyatlar, potensialın yaradılması və dayanıqlı inkişafla bağlı prioritet məsələləri müzakirə etdilər və daha sonra proqramın nəaliyətlərinə dair təqdimat baş tutdu. Bundan əlavə, sessiyada planlaşdırma və proqram koordinasiyasının əməkdaşı Erzsebet İlles Tərəfdaşlıq Proqramının FAO-nun yeni Strateji Çərçivə sənədinin həyata keçirilməsinə necə töhfə verdiyini izah etdi.
İkinci sessiya benefisiar ölkələrin hökumət nümayəndələri tərəfindən təqdim olunan bir sıra təqdimatlar üzrə Proqramın davamlılığına dair məsələlər işıqlandırıldı.
Seminarın ikinci hissəsi panel iclaslarından ibarət olub. “FAO-Türkiyə Tərəfdaşlıq Proqramı çərçivəsində qazanılan təcrübələr” adlı paneldə panel iştirakçıları gender və kənd inkişafı aspektlərini, həmçinin ölkələrdə cari və gələcəyə yönəlik kənd təsərrüfatı və təbii ehtiyatların idarə edilməsində qlobal və regional tendensiyaların vacibliyini vurğulayıblar. Sessiyada FAO-nun “Dörd Yaxşı” konsepsiyasının “daha yaxşı istehsal, qidalanma, ətraf mühit və həyat” vacibliyi vurğulanıb.
Sonuncu panel sessiyasında Azərbaycan, Qırğızıstan, Türkiyə və Özbəkistandan olan mütəxəssislər regional kommunikasiya strategiyaları və proqramların nailiyyətlərinin təbliğatına dair məsələlər müzakirə olunub. Bundan başqa, Dayanıqlı İnkişaf Məqsədlərinin (DİM) proqramın fəaliyyətinə inteqrasiyasının vacibliyinə toxunulub.
Tədbirin sonunda iştirakçılar regional əməkdaşlıq sayəsində Proqramın ümumilikdə DİM-lərə nail olunmasına, xüsusilə də Yoxsulluq və Aclığın aradan qaldırılması kimi qlobal məqsədlərə nail olmaq üçün birgə fəliyyətin önəmi bir daha qeyd edilib.