Aprelin 27-28-də Çinin paytaxtı Pekində Asiya İnfrastruktur İnkişaf Bankı (AİİB) təsisçilərinin 4-cü iclası keçirilib. Fins.az-ın Maliyyə Nazirliyinə istinadən yaydığı məlumata görə, müzakirələrdə bankın 57 təsisçi üzvü olan ölkələrdən 55-i, o cümlədən Azərbaycan Respublikasından Maliyyə Nazirliyinin nümayəndələri iştirak edib.

Təsisçi ölkələrin 4-cü iclasda AİİB-nın nizamnamə layihəsi üzrə aparılan danışıqlarda geniş konsesus əldə olunub. Müzakirələr zamanı bankın nizamnamə layihəsi üzərində işlərin 2015-ci il iyun ayı ərzində tamamlanaraq təsisçi ölkələr tərəfindən imzalanması və cari ilin sonunadək Asiya İnfrastruktur İnkişaf Bankının fəaliyyətinin təmin olunması qərara alınıb.