“Bu platforma 30 illik davam edən işğalın nəticələrini və bərpa işlərini dünya ictimaiyyətinə çatdırmaq üçün mühümdür. Bilirik ki, Qarabağda təbiətə ciddi ziyan vurulub. Bu platforma ziyanın dünya ictimaiyyətinə çatdırılmasında mühüm rol oynayacaq”. 

Bunu ekologiya və təbii sərvətlər naziri Muxtar Babayev Qarabağ Dirçəliş Fondunun “Karabakh.Center” layihəsinin təqdimat mərasimində bildirib.

Nazir bildirib ki, Fondun yaradılması torpaqlarımıza qayıdışın rəmzidir: “Qarabağ bölgəsi təbii sərvətlər və biomüxtəliflik baxımından çox zəngindir. Hazırda “Qırmızı kitab”ın 3-cü nəşrinin hazırlanmasına başlanılıb. Flora və faunanın tədqiq edilməsi üçün işlərə də start verilib. Qarabağda su obyektlərinin istifadəsi ilə bağlı dövlət nəzarəti olacaq. Burada təbii olaraq çıxan bulaqlar üzərində kurort mərkəzlərin yaradılması nəzərdə tutulur. Transsərhəd çayları davamlı çirklənməyə məruz qalıb. Xüsusilə də bu, Oxçuçay üzərində baş verir. Bu məsələni dünya ictimaiyyətinə göstərmək üçün resursun imkanından istifadə ediləcək. 

Xüsusilə qeyd etməliyik ki, iqlim dəyişikliyinə təsir etmək üçün böyük imkanlar yaradılıb. Minlərlə hektar sahədə meşə-bərpa işlərinin həyata keçirilməsi, minlərlə ağacın əkilməsi nəzərdə tutulur. Əminik ki, bu platforma Qarabağ həqiqətlərini beynəlxalq ictimaiyyətə çatdıracaq etibarlı mənbə olacaq”.