Bu gün insanlarda könüllü sığorta növlərində əsasən minimal məhsullar, yəni "mini paketlər" mövcuddur. Bu sığorta növlərinin inkişafı üçün isə beynəlxalq sığorta şirkətlərinin cəlb edilməsi çox vacibdir. Çünki əsas atılacaq addım bu olmalıdır.

Bunu Finss.az-a açıqlamasında sığorta eksperti Emil Ağabağırov deyib.

Onun sözlərinə görə, bununla yanaşı, insanların sığorta sisteminə fərdi yanaşması, ümumi bir şablon deyil, məhz fərdi yanaşmaların tətbiqi vacibdir:

“Belə yanaşmalar vasitəsilə insanlara sığortanın mahiyyətini izah etmək və onlara bu məhsulun faydalarını anlatmaq sığorta mədəniyyətini artıracaq.

Bu gün Aqrar Sığorta Fondu artıq Türkiyənin TARSİM şirkəti ilə əməkdaşlıq edir və müqavilə bağlayıb. Onların praktikasını və təcrübəsini əsas götürərək aqrar sığorta məhsullarının satışını həyata keçirir və bu təcrübəyə uyğun olaraq təminatlar təqdim edir, bəzi istisnalar əlavə edir. Lakin, hələ də bazara daha çox "mini paket"lərin çıxarılması və sığortanın mahiyyətini izah etmək məqsədilə insanları cəlb etmək önəmlidir”.

Beləliklə, əsas hədəf sığorta məhsullarını fərdi yanaşma ilə təqdim etmək və insanlara bu məhsulların faydalarını anladaraq onların sığorta praktikasına cəlb edilməsini təmin etməkdir. Bu prosesin effektivliyi, eyni zamanda, sığorta şirkətlərinin cəlb olunmasında mühüm rol oynayacaqdır.

Fuad Mədətov
Finss.az