Finss.az - Çin yeni süni intellekt agenti olan Manus-u təqdim edib və onun OpenAI modellərini performans baxımından üstələdiyini iddia edir.

ForexLive portalının Shanghai Securities Newsa istinadən verdiyi məlumata görə, Manus süni intellekt sahəsində mühüm yeniliklər vəd edir. O, GAIA göstərici testində ən yüksək nəticə göstərərək, yüksək texnologiyalı ümumi təyinatlı süni intellekt köməkçisi kimi təqdim olunub.

Ənənəvi süni intellekt modellərindən fərqli olaraq, Manus təkcə ideya yaratmaqla kifayətlənmir, həm də onları real dünyada həyata keçirmək imkanına sahibdir. Bu xüsusiyyət ona mürəkkəb tapşırıqları müstəqil şəkildə yerinə yetirmək imkanı verir.

Çinin yeni süni intellekt agentinin təqdimatında onun hesabatlar yazmaq, fərdi nəticələrlə cədvəllər yaratmaq bacarığı nümayiş etdirilib. Bundan əlavə, Manus yüksək adaptiv "rəqəmsal beyinə" sahibdir. Bu, ona müstəqil şəkildə öyrənmək, mürəkkəb təlimatları emal etmək və müxtəlif sahələr arasında əməkdaşlıq aparmaq imkanı verir.

Mütəxəssislər hesab edirlər ki, Manusun təqdim edilməsi süni intellekt bazarında yeni rəqabət mərhələsinin başlanğıcı ola bilər.