Türkiyənin ən mötəbər idman tədbirlərindən biri olan Prezident Velosiped Turu (TUR 2025) bu il 60-cı dəfə təşkil olunacaq. Yarış, 27 aprel – 4 may tarixlərində ölkənin marşrutları boyunca keçiriləcək.
Finss.az xəbər verir ki, Türkiyə Velosiped Federasiyası tərəfindən, Türkiyə Respublikası Prezidentinin himayəsi ilə, Gənclər və İdman Nazirliyi və Türkiyə Turizm Tanıtım və İnkişaf Agentliyinin (TGA) dəstəyi ilə təşkil ediləcək yarış ölkənin idman tarixində mühüm yer tutur. Bu ilki tur, 60-cı ildönümünün yaratdığı xüsusi coşğu ilə yadda qalacaq.
Tura Antalyadan start veriləcək və səkkiz günlük, səkkiz mərhələli marşrut İzmir şəhərində başa çatacaq. Yarışa ABŞ, Almaniya, Belçika, Çin, Fransa, Niderland, İspaniya, İtaliya, Qazaxıstan, Malayziya, Norveç, Polşa və Türkiyəni təmsil edən komandalar qatılacaq.
Yarışda həm tanınmış peşəkar velosipedçilər, həm də gələcək vəd edən gənc idmançılar mübarizə aparacaqlar. Marşrut boyunca iştirakçılar Türkiyənin tarixi və turistik bölgələrindən keçəcək, bu isə ölkənin zəngin mədəni və təbii sərvətlərinin beynəlxalq arenada tanıdılmasına töhfə verəcək.
Dünyanın aparıcı idman tədbirlərindən biri sayılan Prezident Velosiped Turu (TUR 2025) yalnız peşəkar idmançıların bacarıqlarını yoxlamaqla kifayətlənmir – bu yarış həm də Türkiyənin mədəni və təbii zənginliklərini dünyaya tanıdır.
Beş qitə üzrə 190 ölkədə, 13 dildə canlı yayımlanan yarış, velosiped idmanının qlobal diqqət mərkəzində olduğu nüfuzlu platformalardan biri kimi çıxış edir. Turun marşrutu iştirakçıları və tamaşaçıları Türkiyənin ikonik mənzərələri ilə yanaşı, az tanınan təbii inciləri ilə də tanış edəcək.
Yarışçılar portağal, limon və naringi bağları arasından keçəcək, ətrini əhəng və kəklikotunun bürüdüyü yollarla irəliləyəcəklər. Mənzərələri şam, zeytun və saqqız ağacları bəzəyəcək.
Eyni zamanda, dünya tamaşaçıları türk mədəniyyətinin simvolları ilə də tanış olacaqlar – çay, qəhvə, simit və məşhur “nazar boncuğu” (gözmuncuğu) kimi yerli dəyərlər ekranlara daşınacaq.
Tur, Türkiyə Rivierasının ürəyi olan Antalyadan başlayaraq, Kemer, Kalkan, Fethiye, Marmaris, Akyaka, Aydın, Kuşadası, Selçuk və Çeşmədən keçərək, Egey bölgəsinin incisi İzmirdə yekunlaşacaq.
Antalyada keçiriləcək ilk mərhələ (132 km) iştirakçıları Kaleiçi küçələri, Hadrian qapısı, Yivli Minarə kimi tarixi məkanlar və qədim Silyon şəhəri ilə tanış edəcək. Belek bölgəsi də bu mərhələdə önə çıxacaq.
İkinci mərhələ Kemer-Kalkan istiqamətində (167,4 km) baş tutacaq. Bu hissədə velosipedçilər Patara çimərliyi, məşhur Yanartaş alovları, Likya dövrünün mirvarisi Myra, Finike, Demre, Kaş və Kaputaş kimi görməli yerlərdən keçəcəklər.
Fethiye-Marmaris mərhələsi (175,9 km) isə tamaşaçılara vizual ziyafət vəd edir. Marşrut Kəpənəklər vadisi, Ölüdəniz, nəsli təhlükədə olan Caretta caretta tısbağaları və Dalyan deltası ilə seçiləcək.
TUR 2025 yalnız idman deyil, həm də mədəniyyət və təbiət festivalına çevriləcək – Türkiyənin irsi bir daha dünya səhnəsində nümayiş olunacaq.
TUR 2025 çərçivəsində təşkil olunacaq növbəti mərhələlər, Türkiyənin Egey sahilləri boyunca uzanan unikal marşrutlarla ölkənin həm idman, həm də turizm potensialını beynəlxalq auditoriyaya tanıdacaq.
Dördüncü mərhələ Marmaris–Akyaka istiqamətində (115,4 km) keçiriləcək və iştirakçılar dəniz mənzərəli meşə yollarından, yelkənli qayıq marşrutlarından və kite-sörf çimərliklərinin fonunda yarışacaqlar. Ardınca baş tutacaq Marmaris–Aydın mərhələsi (151 km) qədim Afrodisias şəhəri və Egeyin rəmzinə çevrilmiş zeytun bağları ilə yadda qalacaq.
Kuşadası–Selçuk mərhələsi (161,4 km) isə UNESCO-nun Dünya İrsi Siyahısında yer alan Efes, Artemida məbədi və Məryəm Ana evi kimi tarixi məkanları əhatə edəcək. Bunun ardından gələn Selçuk–Çeşmə mərhələsində (144,2 km) Şirince kəndi, Seferihisar və Çeşmə bölgələri ön plana çıxacaq.
Yarışın finalı Çeşmə–İzmir mərhələsində (105,7 km) keçiriləcək və burada İzmir Saat Qülləsi, yerli ləzzətlər, qədim abidələr və bölgənin məşhur üzüm bağları yarışa zəngin sonluq verəcək.
Beynəlxalq Velosiped İttifaqının (UCI) Avropa Turları təqvimində “ProSeries” kateqoriyasına daxil edilən bu yarış, Türkiyənin qlobal velosiped idmanındakı önəmli rolunu da vurğulayacaq. Tur yalnız yollarla məhdudlaşmır – iştirakçılar üçün velosiped dostu otellər, təhlükəsiz park yerləri, velosiped təmizləmə və təmir xidmətləri kimi infrastruktur imkanları ilə də diqqət çəkir.
