Finss.az - Avropa İttifaqında maye təbii qazın (MTQ) sutkalıq idxalı ötən həftə tarixi rekorda çataraq 460 milyon kubmetri ötüb.

Bu barədə Gas Infrastructure Europe (GIE) təşkilatının son statistik məlumatlarında bildirilir.

Bununla belə, Avropa ölkələrinin yeraltı qaz anbarlarına (YQA) qazın vurulma tempi bir qədər zəifləyib. Buna səbəb kimi regionda müşahidə olunan yüngül soyuma və enerji istehlakındakı dəyişikliklər göstərilir. Hazırda YQA-larda mövcud ehtiyatlar ötən ilin eyni dövrü ilə müqayisədə 24,2 milyard kubmetr və ya 34% azdır.

Əsas göstəricilər:

• 10 mayda Aİ ölkələrində gündəlik qaz vurulması 385 mln kubmetr təşkil edib.

• Gündəlik çıxarılma həcmi 21 mln kubmetrə qədər azalıb.

• May ayının ilk ongünlüyündə vurulma ötən illə müqayisədə 32% artıb, çıxarılma isə 39% azalıb.

• Hal-hazırda YQA-ların doluluq səviyyəsi cəmi 42,5%-dir, bu da son 5 ilin orta göstəricisindən 10 faiz bəndi aşağıdır.

Avropa Komissiyası ölkələrə YQA-ların 1 noyabra qədər 90% dolu olmasını tələb edir. Bu isə mövsüm ərzində qaz bazarında təzyiqi artıraraq qiymətlərin yüksəlməsinə səbəb olur. TASS agentliyinin hesablamalarına görə, bu normanı yerinə yetirmək üçün Aİ ölkələrinin ən azı 61 milyard kubmetr həcmində xalis qaz vurması tələb olunur – bu, ötən ilə nisbətən təxminən 50% çoxdur.

Qlobal rəqabət artır

“Qazprom”un öncədən xəbərdarlıq etdiyi kimi, Avropa bu yay mövsümündə ehtiyatlarını bərpa etməkdə çətinliklərlə üzləşə bilər. Region ölkələri daha çox qaz almağa məcbur olduqları halda, Asiyada da MTQ-yə tələbat artır. Bu isə Avropa ilə Asiya arasında tədarük uğrunda rəqabəti kəskinləşdirir.

Ekspertlər proqnozlaşdırırlar ki, yay aylarında qazın birja qiymətləri hətta qış göstəricilərini də keçə bilər. Bu da anbarların doldurulmasının iqtisadi effektivliyini sual altına alır.