Finss.az - ABŞ Prezidenti Donald Tramp gömrük rüsumlarının ölkə iqtisadiyyatına böyük töhfə verdiyini bildirib.

Çərşənbə axşamı Ağ Evdə çıxışı zamanı Tramp qeyd edib ki, Birləşmiş Ştatlar gömrük rüsumları vasitəsilə gündəlik olaraq təxminən 2 milyard dollar gəlir əldə edir.

“Biz gömrük rüsumları sayəsində demək olar ki, gündə 2 milyard dollar əldə edirik. İşlər çox yaxşı gedir”, – deyə Tramp vurğulayıb.

Prezidentin sözlərinə görə, bu gəlir səviyyəsi ABŞ tarixində indiyədək müşahidə edilməyib: “Bu səviyyədə pul axınını daha əvvəl heç vaxt görməmişdik.”

Xatırladaq ki, ötən həftə Tramp administrasiyası ABŞ-ın 185 xarici ticarət tərəfdaşına qarşı “qarşılıqlı” gömrük rüsumlarının tətbiq edildiyini elan edib. Yeni tədbirlər çərçivəsində minimal baza rüsumu 10% olaraq müəyyən edilib. Bununla belə, bir sıra ölkələr üçün rüsum dərəcələri ABŞ-ın həmin ölkələrlə olan ticarət balansındakı kəsirə əsasən fərdi qaydada hesablanacaq.

Yeni gömrük siyasətinin ABŞ iqtisadiyyatına və beynəlxalq ticarət münasibətlərinə necə təsir edəcəyi yaxın aylarda daha aydın olacaq.