Finss.az - 2025-ci ilin mart ayında Rusiyanın federal büdcəsinə daxil olan neft-qaz gəlirləri 1,08 trilyon rubl təşkil edib.

Bu, ötən ilin eyni dövrü ilə müqayisədə 17% azalma deməkdir. Beləliklə, ardıcıl ikinci ayda bu göstərici illik müqayisədə azalma tendensiyasını davam etdirib.

Maliyyə Nazirliyi gəlirlərin azalmasını neftin ucuzlaşması, rublun möhkəmlənməsi və Qərb ölkələrinin tətbiq etdiyi sanksiyalarla izah edir. Aylıq göstəricilərdə isə 40%-lik artım əsasən əlavə gəlir vergisinin (ƏGV) rüblük ödənişlərinin hesabına mümkün olub. Lakin bu da gözləntiləri tam qarşılamayıb – ƏGV-dən faktiki gəlir proqnozdan 65,6 milyard rubl az olub.

Əlavə ƏGV gəlirləri cəmi 21,3 milyard rubl təşkil edib ki, bu da ötən ilin analoji dövrü ilə müqayisədə 15 dəfə azdır. Aprel ayında isə cəmi 29,7 milyard rubl gəlir gözlənilir. Gözlənilən gəlirlərin reallaşmaması fonunda Rusiya Maliyyə Nazirliyi aprelin 7-dən etibarən 35,9 milyard rubl həcmində valyuta və qızıl satışına başlayacaq.

Gəlirlərin azalmasına Urals markalı neftin qiymətinin 6300 rubldan 5700 rubla düşməsi və hasilatın azalması təsir edib. Bundan əlavə, ABŞ-ın tətbiq etdiyi yeni sanksiyalar Rusiya neft şirkətləri və logistika sektorunu daha da çətin vəziyyətə salıb. Qaz ixracında da geriləmə müşahidə olunur – bu, Ukrayna üzərindən tranzitin dayandırılması ilə əlaqədardır.

Hazırda Rusiya büdcəsinin kəsiri artıq 5 trilyon rubldan çoxdur. Hökumət vəziyyəti balanslaşdırmaq üçün Milli Rifah Fondundan (MRF) vəsaitlərə müraciət etməyə və dövlət borcunu artırmağa hazırlaşır. Ekspertlər vəziyyətin yay aylarında sabitləşəcəyini gözləyirlər, lakin risklər hələ də qalır.