Beynəlxalq dəniz təsnifat cəmiyyəti olan “Lloyd's Register” (“LR”), "Fincantieri" gəmiqayırma qrupunun törəmə müəssisəsi  və dünyada xüsusi gəmilərin inşasında ilk şirkətlər arasında olan VARD-a  Şotlandiyanın "North Star" şirkətinin sifarişi ilə tikilən iki külək istismarı və xidmət gəmisi (CSOV) üçün metanol bunker sistemi üçün Prinsipdə Təsdiq (AiP) təqdim edib.

Fins.az xəbər verir ki, bu gəmilər, VARD 4 22 dizaynına əsaslanır və metanol tutumlu ilk gəmi dizaynıdır. 2023-cü ilin may ayında North Star və VARD arasında müqavilə imzalanıb və hər iki şirkət metanolun dəniz yanacağı kimi istifadəsinə icazə almaq üçün Lloyd's Register ilə əməkdaşlıq edib. Təsdiq, iki səviyyəli risk təhlili və dizayn düzəlişlərindən sonra əldə edilib.

Yeni CSOV-lər, metanolla işləyə bilən ilk külək enerjisi gəmiləri olacaq. Gəmilər, yüksək konvertasiya qabiliyyətinə malikdir və mühərrik istehsalçısı tərəfindən təmin edilən müvafiq dəstdən istifadə edərək metanola çevrilə bilər. Gəmilərin uzunluğu təxminən 95 metr, eni isə 19,5 metr olacaq, maksimum sürəti isə 14 düyün təşkil edəcək. Həmçinin, gəmilər ən müasir DP2 yerləşdirmə sistemləri ilə təchiz olunub və 111 nəfərin yerləşə biləcəyi 95 kabinəyə malikdir.

Bu layihə, Norveçin Vard Design mühəndislik konstruktor bürosu ilə əməkdaşlıqda hazırlanıb.