Devrilmiş lider Bəşər Əsəd ölkədən qaçıb, arxasında isə dağıntılar buraxıb.

Fins.az xəbər verir ki, ölkə hələ də idarə olunmadığı üçün yağma xəbərləri geniş yayılıb. Hətta Suriya Mərkəzi Bankının da talan edildiyi iddia olunur.

Toparlanma on il çəkə bilər
Analitiklərin fikrincə, Suriyanın iqtisadiyyatı bərpa olunması üçün on ilə qədər zamana ehtiyac duyur. Əgər siyasi sabitlik bərpa olunsa və beynəlxalq dəstək təmin edilsə, ölkənin daha tez rifaha çatmaq imkanı yarana bilər.

Jusoor Studies Centre-dən iqtisadçı Xalid Əl-Tərkavi bildirib ki, Suriyanın iqtisadiyyatını tam bərpa etmək üçün 7-8 illik iş tələb olunur. Siyasi şərait düzələrsə və institusional sabitlik təmin olunarsa, iqtisadiyyat 2011-ci ilin səviyyəsindən də yuxarı qalxa bilər.

İllegal iqtisadiyyatın təsiri
2011-ci ildən əvvəl sürətlə inkişaf edən Suriya iqtisadiyyatı, Dünya Bankının məlumatına görə, 2021-ci ilə qədər 2010-cu ilin səviyyəsinə nisbətən 54% azalıb. Ölkə, son illərdə əsasən qeyri-leqal iqtisadiyyat və narkotik ticarəti ilə ayaqda durub. Dünya Bankının hesablamalarına görə, Suriyada istehsal olunan narkotiklərin illik dəyəri 1,9 milyard ilə 5,6 milyard dollar arasında dəyişir.

Beynəlxalq dəstək vacibdir
Mütəxəssislər vurğulayırlar ki, Suriyanın yenidən qurulması üçün Avropa İttifaqı, Körfəz ölkələri, Çin, Türkiyə və beynəlxalq maliyyə qurumlarının dəstəyi həyati əhəmiyyət daşıyır. Lakin siyasi qeyri-müəyyənliklər bu dəstəyin miqyasını sual altına qoyur.

Suriyanın gələcəyi beynəlxalq dəstək və daxili sabitlikdən asılıdır. Bu problemlərin həlli ölkənin daha parlaq bir gələcəyə addım atmasına kömək edə bilər.