FAO-nun Avropa və Mərkəzi Asiya üzrə regional nümayəndəsi Viorel Qutu bildirib ki, dünya 2050-ci ilə qədər ərzaq istehsalını hazırkı səviyyə ilə müqayisədə 50 faiz artırmalıdır.
O, bu barədə "Su, enerji, qida və ekosistemlər üzrə regional əməkdaşlıq vasitəsilə iqlim fəaliyyətinin sürətləndirilməsi" adlı tədbirdə çıxışı zamanı qeyd edib.
Viorel Qutunun sözlərinə görə, dünya beş təcili və bir-biri ilə əlaqəli böhranla üzləşir. Bu böhranların mərkəzində ərzaq və kənd təsərrüfatı dayanır:
- Ərzaq Təhlükəsizliyi Böhranı
Hazırda 730 milyona yaxın insan aclıqdan əziyyət çəkir. 2050-ci ildə dünya əhalisinin 10 milyard nəfərə çatacağı proqnozlaşdırılır. Buna baxmayaraq, dünya hələ də ikinci Dayanıqlı İnkişaf Məqsədinə (DİM) - aclığın aradan qaldırılmasına nail olmayıb. "Hər kəsi qidalandırmaq üçün ərzaq istehsalını indiki səviyyədən 50 faiz artırmaq zəruridir", - deyə Qutu vurğulayıb. - İqlim Böhranı
Kənd təsərrüfatı sistemləri iqlim dəyişikliyindən ciddi təsirlənir. Bununla yanaşı, bu sistemlər qlobal istixana qazı emissiyalarının təxminən 30 faizinə səbəb olur. - Su Böhranı
Dünya üzrə şirin suyun təxminən 70 faizi kənd təsərrüfatı üçün istifadə olunur. Suvarma məqsədilə suya olan tələbatın gələcəkdə 10 faiz artacağı, hətta bu göstəricinin 30 faizə qədər yüksələcəyi proqnozlaşdırılır. Bu isə əlavə enerji xərcləri deməkdir. - Enerji Böhranı
Kənd təsərrüfatı bütün istifadə olunan enerjinin təxminən 30 faizini istehlak edir. Bununla yanaşı, qlobal enerji istehlakının 50 faiz artacağı gözlənilir. - Təbiət Böhranı
Kənd təsərrüfatı biomüxtəlifliyin itirilməsində və torpaqların deqradasiyasında əsas rol oynayır. Bununla belə, davamlı kənd təsərrüfatı sağlam ekosistemlərdən və münbit torpaqlardan asılıdır.
Viorel Qutu qeyd edib ki, bu böhranlar bir-biri ilə sıx əlaqəlidir və onların həlli üçün sistemli yanaşma tələb olunur. Ərzaq təhlükəsizliyinin təmin edilməsi, iqlim dəyişikliyinə qarşı mübarizə və biomüxtəlifliyin qorunması üçün regional və qlobal səviyyədə əməkdaşlıq vacibdir.
"Dünya olaraq bu çağırışları qəbul etməli və kənd təsərrüfatı sistemlərində həm iqlim adaptasiyasına, həm də təsirlərin azaldılmasına yönəlmiş tədbirləri sürətləndirməliyik", - deyə o əlavə edib.
Fuad Mədətov
Fins.az