Fins.az - Almaniya hökuməti 2024-cü ilin yanvarından 15 oktyabra qədər 10,9 milyard avro dəyərində silah ixracı lisenziyası verib.

Bu göstərici ötən ilin rekorduna yaxınlaşır, çünki 2023-cü ildə təsdiq edilən silah tədarüklərinin ümumi həcmi 12,2 milyard avro təşkil edib. İxrac edilən silahların əksəriyyəti döyüş silahlarına aid olub və onların ümumi dəyəri 7,2 milyard avroya çatıb. Tədarüklərin artması xüsusilə Ukraynanın dəstəklənməsi ilə əlaqədardır. 2024-cü ilin ilk yarısında Kiyevə göndərilən silahların dəyəri 4,9 milyard avro olub.

Lakin bu tədarüklər Almaniyanın 2021-ci ildə bağladığı koalisiya sazişi ilə ziddiyyət təşkil edir. Koalisiya partiyaları ("Sosial-Demokratik Partiya", "Yaşıllar" və "Azad Demokrat Partiyası") bu sazişdə silah ixracını azaltmağa dair öhdəlik götürmüşdü.

Bundestaq deputatı Sevim Dağdelen hökuməti sərt şəkildə tənqid edib və müdafiə sənayesinin maraqlarını qorumaqda, həmçinin verilən vədləri pozmaqda ittiham edib. Bu mövzu Almaniya mətbuatında və ictimaiyyət arasında geniş müzakirələrə səbəb olub, hökumətin elan etdiyi siyasət ilə reallıq arasındakı uyğunsuzluq diqqət mərkəzindədir.