Səudiyyə Ərəbistanı, Fins.az  - Səudiyyə Ərəbistanı iqtisadiyyatını neftdən asılılıqdan azad etmək məqsədilə həyata keçirdiyi iddialı dəyişiklik planında əhəmiyyətli addımlar atır. Ölkənin maliyyə naziri Məhəmməd əl-Cədan, Riyadda keçirilən Future Investment Initiative (FII) konfransının ikinci günündə çıxış edərək ölkənin əldə etdiyi nailiyyətlərdən məmnun olduğunu vurğulayıb və gələcəkdə daha böyük uğurlara nail olacaqlarını bildirib.

Vəliəhd Şahzadə Məhəmməd bin Salmanın rəhbərlik etdiyi "2030 Vizyonu" iqtisadiyyatın qeyri-neft sektoru istiqamətində inkişaf etdirilməsi, özəl sektorun gücləndirilməsi və yeni iş yerləri yaradılmasına yönəlib. Bu çərçivədə, 925 milyard dollar kapitallı Dövlət İnvestisiya Fondu (DIF) NEOM adlı futuristik şəhərin inşası da daxil olmaqla genişmiqyaslı infrastruktur layihələrinin həyata keçirilməsini planlaşdırır.

Beynəlxalq miqyasda Uber və SoftBank kimi iri şirkətlərə yatırımları ilə tanınan fond, indi xarici investisiyaların payını azaldaraq daxili layihələrə yönəlməyi nəzərdə tutur. Birbaşa xarici investisiyaların (BXİ) cəlbi də dəyişikliklərə dəstək verən mühüm elementlərdən biri kimi göstərilir. Hökumət 2030-cu ilə qədər 100 milyard dollar BXİ cəlb etməyi planlaşdırır ki, bu da ölkənin ÜDM-nin təxminən 6 faizini təşkil edəcək.

Neftin azalan qiymətləri və hasilatı hökumətin gəlirlərinə təsir göstərərək krallığın bəzi "2030 Vizyonu" layihələrini təxirə salmasına və prioritetləri yenidən nəzərdən keçirməsinə səbəb olub. Lakin hökumət iqtisadiyyatı diversifikasiya etmək məqsədilə daha çox tədbirlər görməyi hədəfləyir.