Xiaomi öz təqdimat tədbiri çərçivəsində ilk kompakt ölçülü stolüstü kompüterini təqdim edib. Şirkətin ilk stolüstü kompüteri Xiaomi Mini Host adını əldə edib və xarici görünüşcə o, Apple şirkətinin Mac mini modelini xatırladır. Xiaomi Mini Host kompüterinin gövdəsi alüminium materialdan hazırlanıb və onun çəkisi cəmi 470 qramm təşkil edir. Texniki özəlliklər baxımından kompüter Intel Core i5-1240P prosessoru, Intel Irıs Xe qrafikası, DDR4 standartlı 16 GB RAM və 512 GB həcmində SSD PCle 4 ilə təchiz olunub. Şirkətin verdiyi məlumata əsasən Mini Host-un maksimal enerji sərfiyyatı 100 vatt təşkil edir.

 Bununla yanaşı alıcılar Mini Host-un RAM-a və SSD yaddaşa sahib olmayan versiyasnı da əldə edə bilərlər. Bu halda onlar kompüteri öz istəklərinə uyğun olan RAM və yaddaş ilə təchiz edə bilərlər. Qeyd etmək lazımdır ki, Xiaomi-nin ilk stolüstü kompüteri 32 GB-a kimi RAM yaddaşını və 4 TB-a kimi daxili yaddaş həcmini dəstəkləyir. Xiaomi Mini Host həmçinin özündə USB 3.2, USB 2.0, 2 ədəd HDMI, 2 ədəd Thunderbolt 4 və Mini-Jack girişlərini birləşdirir. Kompüter Bluetooth 5.3 texnologiyasının və Wi-Fi 6 şəbəkə standartının dəstəyinə sahibdir. Xiaomi Mini Host Windows 11 vasitəsilə çalışır. Kompüterin RAM və daxili yaddaş həcminə sahib olmayan versiyası 400$-a, 16 GB RAM-a və 512 GB yaddaş həcminə sahib versiyası isə 530$-a satılır.