Finss.az xəbər verir ki, CNBC-nin məlumatlı mənbələrə istinadən yaydığı məlumata görə, Elon Muskın süni intellekt sahəsində fəaliyyət göstərən Amerika startapı xAI, növbəti investisiya turunda 15 milyard dollar vəsait cəlb edib. Mənbələrin bildirdiyinə görə, investisiyanın böyük hissəsi şirkətin böyük dil modellərini təlimləndirmək üçün zəruri olan qrafik emal qurğularının (GPU) alınmasına yönəldiləcək.

Son investisiya turundan sonra xAI-ın ümumi dəyəri 200 milyard dollara yüksəlib. Bu göstərici şirkəti bazarın ən dəyərli süni intellekt şirkətləri sırasında ön mövqeyə çıxarır. Müqayisə üçün, xAI-ın əsas rəqiblərindən Anthropic-in dəyəri 183 milyard dollar, OpenAI-nin dəyəri isə 500 milyard dollar olaraq qiymətləndirilib.

Qeyd edək ki, Elon Musk sentyabr ayında X sosial media platformasında paylaşım edərək şirkətin hazırda kapital cəlb etmədiyini bildirmişdi. Bununla belə, son tur göstərir ki, xAI-ın süni intellekt bazarındakı mövqeyi və investor marağı sürətlə artmaqdadır. Yeni vəsait şirkətin özünün Grok modeli də daxil olmaqla böyük dil modellərinin inkişafını gücləndirməsi üçün nəzərdə tutulub.