“SP Global Ratings” agentliyinin qiymətləndirməsinə görə, Azərbaycan Respublikası Dövlət Neft Şirkəti (SOCAR)-ın maliyyə göstəriciləri qarşıdakı illərdə nisbi sabit qalacaq, baxmayaraq ki, göstəricilərin yaxşılaşması üçün imkanlar məhduddur.

Finss.az xəbər verir ki, agentliyin proqnozlarına görə, SOCAR-ın EBITDA göstəricisi 2025-2027-ci illərdə 2024-cü ildəki 6,7 milyard manat səviyyəsindən 5,5-6 milyard manat arasında olacaq. Bu azalma əsasən dünya bazarında neft və qazın qiymətlərinin aşağı düşməsi və karbohidrogen hasilatının tədricən azalması ilə bağlıdır.

Buna baxmayaraq, “SP”nin qiymətləndirməsinə görə, əməliyyat fəaliyyətindən əldə olunan pul axınları (FFO) ümumilikdə sabit qalacaq. Bu, vergi yükünün azalması və faiz xərclərinin cüzi şəkildə enməsi ilə izah olunur. Agentliyin baza ssenarisinə əsasən, SOCAR FFO-nun borca nisbətini 12-15% diapazonunda saxlayacaq.

“SP” həmçinin qeyd edir ki, proqnozda kapital xərcləri (Capex) illik təxminən 3 milyard manat səviyyəsində artım nəzərə alınıb. Bu, hasilat layihələrinə mümkün investisiyaları və sabit dividend ödənişlərinin qorunmasını əks etdirir.

Agentliyin qiymətləndirməsinə görə, SOCAR-ın korrektə edilmiş borc göstəricisi orta-müsbət sərbəst əməliyyat pul axınına (FOCF) baxmayaraq, yüksək səviyyədə – təxminən 27,5-28 milyard manat, FOCF isə təxminən 1 milyard manat civarında qalacaq.

Eyni zamanda, “SP” hesablamalarda ümumi borcun (pul vəsaitləri nəzərə alınmadan) əsas götürüldüyünü vurğulayır. 2024-cü ilin sonuna SOCAR-ın balansında təxminən 14 milyard manat həcmində pul vəsaitləri mövcuddur ki, bu da xüsusilə qısamüddətli öhdəliklərin yüksək payı nəzərə alındıqda şirkətin likvidliyini dəstəkləyir.

Fuad Mədətov
Finss.az