Finss.az xəbər verir ki, çərşənbə səhəri neft qiymətləri əvvəlki gün cüzi dəyişiklikdən sonra əhəmiyyətli dərəcədə artıb.

İnvestorlar OPEC+ hasilat kvotalarında gözləniləndən daha kiçik artımdan sonra bazarda tələb və təklif balansını qiymətləndirirlər. Onlar həmçinin ABŞ-ın neft ehtiyatlarına dair məlumatları gözləyirlər.

Londonun ICE Futures Exchange birjasında Brent markalı neftin dekabr fyuçerslərinin qiyməti Moskva vaxtı ilə saat 8:12-də əvvəlki bağlanışdan 0,48 dollar (0,73%) artaraq 65,93 dollar/barel təşkil edib. Çərşənbə axşamı bu müqavilələr 0,02 dollar (0,03%) ucuzlaşaraq 65,45 dollar/barelə düşüb.

Nyu-York əmtəə birjasında (NYMEX) noyabr ayı üçün WTI neftinin fyuçersləri 0,51 dollar (0,83%) artaraq 1 barelə görə 62,24 dollar təşkil edib. Əvvəlki sessiyanın nəticələrinə görə onların qiyməti 0,04 dollar (0,06%) artaraq 61,73 dollar/barel olub.

Səkkiz OPEC+ ölkəsi noyabrda hasilat kvotalarını oktyabrda olduğu kimi sutkada 137 min barel artırmağa razılaşıb. Bazar iştirakçıları, kvota artımının sutkada 500.000 barelə çata biləcəyinə dair media xəbərlərindən sonra daha aqressiv artım gözləyirdilər.

Amerika Neft İnstitutu (API) ötən həftə ABŞ-ın xam neft ehtiyatlarının 2,78 milyon barrel artdığını bildirib. Benzin ehtiyatları 1,25 milyon barel, distillə məhsulları ehtiyatları isə 1,82 milyon barel azalıb. API könüllü olaraq neft emalı, anbar və boru kəməri operatorlarından məlumat alır.