Finss.az - İqtisadiyyat Nazirliyi yanında Dövlət Vergi Xidməti (DVX) tərəfindən hüquq və konsaltinq şirkətləri ilə kommersiya hüquqi şəxslərin dövlət qeydiyyatı mövzusunda onlayn görüş keçirilib.

DVX-in Vergi ödəyicilərinin qeydiyyatı və uçotu baş idarəsinin şöbə rəisi Leyla Hüseyn-zadə təqdimatla çıxış edərək ölkəmizdə biznesə başlama sahəsində həyata keçirilən islahatlar, biznesin qeydiyyatı qaydalarında aparılan təkmilləşdirmələr, qanunvericilikdə dəyişikliklər və elektron xidmətlər barədə məlumat verib. Bildirilib ki, biznesin qeydiyyatı sahəsində əldə olunan nəticələr beynəlxalq reytinqlərdə də yüksək göstəricilərlə əksini tapıb. Xarici investisiyalı şirkətlər üçün mövcud imkanlar da diqqətə çatdırılıb.

Görüşdə kommersiya hüquqi şəxslərin reyestr məlumatlarında dəyişikliklər üzrə yeni qaydalar, texniki imkanlar və Dünya Bankı Qrupunun “Business Ready” hesabatının “Biznesə daxilolma” indikatoru üzrə həyata keçirilən işlər barədə məlumat verilib. 2025-ci il üzrə Yol Xəritəsinə uyğun olaraq konsul leqallaşdırılması informasiya sisteminin yaradılması, dövlət orqanlarının məlumat bazalarının inteqrasiyasının genişləndirilməsi, benefisiar mülkiyyətçilərin reyestrinin aparılması və təsisçi dəyişikliyinin proaktiv qeydiyyatı əsas istiqamətlər kimi vurğulanıb.

Tədbir iştirakçılarına qeydiyyat sahəsində statistika, elektron qeydiyyatın xüsusi çəkisinin və xarici investisiyalı müəssisələrin artım göstəriciləri təqdim olunub.

Daha sonra mövcud çağırışlar və təkmilləşmə imkanları müzakirə olunub. Ekspertlər sahibkarların işini asanlaşdırmaq məqsədilə bir sıra təkliflər irəli sürüblər, iştirakçıların sualları cavablandırılıb.