Finss.az xəbər verir ki, dünya şöhrətli auksion evi Sotheby’s, 2024-cü ildə vergidən əvvəl 248 milyon dollar zərər açıqlayıb. Bu göstərici 2023-cü ildəki 106 milyon dollarlıq zərərlə müqayisədə iki dəfədən çox artım deməkdir. Şirkətin komissiya və xidmət gəlirləri də 18% azalaraq 813 milyon dollara düşüb.

Uzun müddətdir davam edən sənət bazarındakı durğunluq, həm Sotheby’s-in, həm də rəqibi Christie’s-in ümumi satışlarına mənfi təsir göstərib. Belə ki, Sotheby’s-in satışları 23% azalaraq 6 milyard dollara, Christie’s-in isə 6% azalaraq 5,7 milyard dollara enib. Maraqlıdır ki, Christie’s eyni dövrdə mənfəətini 18% artıraraq 115 milyon dollara çatdırıb.

Sotheby’s 2020-ci ildən bəri işçi heyətində ixtisarlar aparır. 2024-cü ildə işdən çıxarılma xərcləri 29,2 milyon dollar təşkil edib, bu da əvvəlki ilin 11,4 milyon dolları ilə müqayisədə kəskin artımdır. Bununla belə, işçi sayı cəmi 24 nəfər azalaraq 2,218 nəfər olub.