Dollar sabit qaldı: Trampın açıqlamaları və Jackson Hole simpoziumu bazarları yönləndirir

Finss.az xəbər verir ki, ABŞ dolları çərşənbə axşamı ticarətində əsas valyutalar qarşısında sabit qalıb. Dollar avro və funt sterlinq qarşısında dəyişməz qalarkən, yapon yeni qarşısında cüzi ucuzlaşıb.

Dolların altı əsas valyutaya (avro, İsveçrə frankı, yen, Kanada dolları, funt sterlinq və İsveç kronası) qarşı dinamikasını əks etdirən ICE DXY indeksi 0,01% artıb. Bununla yanaşı, daha geniş spektri əhatə edən WSJ Dollar İndeksi isə 0,01% aşağı düşüb.

Bazar iştirakçıları ABŞ prezidenti Donald Tramp və Ukrayna prezidenti Vladimir Zelenski, eləcə də Avropa liderləri arasında Rusiya-Ukrayna münaqişəsinin nizamlanmasına dair danışıqların nəticələrini qiymətləndirirlər. Tramp üçtərəfli danışıqların təşkilinə ümid etdiyini və münaqişənin yaxın bir-iki həftə ərzində həll edilə biləcəyini bəyan edib.

Sidneydə yerləşən ATFX Global Markets şirkətinin analitiki Nik Tweedale bildirib ki, investorlar danışıqlardan sonra daha çox dəyişkənlik gözləsələr də, bu baş verməyib. Hazırda bazar diqqətini mərkəzi bankların siyasətinə, xüsusilə də ABŞ Federal Ehtiyat Sistemi (Fed)-nin gələcək addımlarına yönəldib.

Həftənin əsas hadisəsi isə Kanzas Siti Federal Ehtiyat Bankının ev sahibliyi etdiyi illik Jackson Hole İqtisadi Simpoziumu olacaq. Burada dünyanın aparıcı mərkəzi bank rəhbərləri bir araya gələcək. Fed sədri Jerome Powell isə cümə günü simpoziumda çıxış edəcək.

Ekspertlər hesab edirlər ki, Powell-ın mesajları dolların qlobal bazarlardakı mövqeyinə və gələcək pul-kredit siyasətinə mühüm təsir göstərəcək.