Finss.az - Qətərin dəstəklədiyi Mayhoola Fondu və Kering-in ortaq mülkiyyətində olan “Valentino” brendinin satışı barədə yayılan xəbərlər təkzib olunub.

Mayhoola-nın baş direktoru Rəşid Mohaməd Rəşid Reuters-ə açıqlamasında bu məlumatların həqiqəti əks etdirmədiyini bildirib.

Qeyd edək ki, bu xəbər yayılandan sonra Kering-in səhmləri Paris birjasında 3%-ə yaxın bahalaşıb. Lakin son iki ildə lüks sektorda yaşanan çətinliklər fonunda şirkətin səhmləri 60%-dən çox dəyər itirib.

2023-cü ildə Kering “Valentino”nun 30%-lik payını 1,7 milyard dollara alıb və 2028-ci ilə qədər qalan 70%-ni almaq öhdəliyi götürüb. RBC Capital Markets-in analitikləri potensial satışın Kering-in maliyyə yükünü azaltmaq üçün müsbət addım ola biləcəyini bildirir.

Son illik hesabatda Mayhoolanın 2026-cı ildə satış opsionundan istifadə etməsi halında, “Valentino”nun tam alınmasının 4 milyard avroya qədər başa gələ biləcəyi vurğulanır. Bu, Kering üçün böyük maliyyə öhdəliyi yaratmağa davam edir.