Fins.az - Azərbaycanda 22 rayon üzrə 66,3 min hektar ərazidə 24 aqroparkın yaradılması istiqamətində genişmiqyaslı işlər davam edir.

İqtisadi Zonaların İnkişafı Agentliyinin İdarə Heyətinin sədri Seymur Adıgözəlovun sözlərinə görə, artıq 23 aqropark fəaliyyətə başlayıb, bir aqroparkda isə tikinti və quraşdırma işləri davam edir.

Qeyd edək ki, aqroparklardan 6-sı heyvandarlıq, 6-sı meyvəçilik, 11-i əkinçilik, 1-i isə çeşidləmə, qablaşdırma və logistika üzrə fəaliyyət göstərir. Bu aqroparkların ümumi layihə dəyəri 1,1 milyard manat təşkil edir və bunun 0,9 milyard manatı özəl investisiya hesabına reallaşdırılır. Dövlət tərəfindən isə aqroparkların yaradılması və inkişafı məqsədilə 158,9 milyon manat dəstək ayrılıb.

Aqroparkların inkişafı ilə bağlı əldə edilən uğurlar arasında 3720 nəfərin daimi işlə təmin edilməsi və 4878 nəfərin mövsümi işlərə cəlb olunması xüsusi yer tutur. Növbəti mərhələdə 1600-dən çox daimi iş yerinin yaradılması nəzərdə tutulur.

2024-cü ildə aqroparklarda 42,5 min hektar torpaq sahəsində əkin dövriyyəsi həyata keçirilib, bunun 35,7 min hektarı suvarılan ərazilərdir. Mütərəqqi suvarma sistemlərinin tətbiqi ilə 26 min hektar sahə (73%) suvarılıb. 2024-cü ildə aqroparklarda 34,1 min ton buğda, 25,5 min ton arpa, 91,8 min ton dən və silos qarğıdalı, 49,7 min ton şəkər çuğunduru, 22,4 min ton pambıq, 17,3 min ton kartof və digər məhsullar istehsal edilib.

Aqroparklarda istehsal olunan kənd təsərrüfatı məhsullarının ümumi dəyəri 150 milyon manata yaxın olub. Heyvandarlıq üzrə ixtisaslaşmış aqroparklarda isə 32,4 min ton süd və 1,3 min ton ət istehsal edilib.

Bu aqroparkların yaradılması və inkişafı, həmçinin yüksək məhsuldarlıq və yeni iş yerlərinin açılması ilə Azərbaycanın kənd təsərrüfatı sahəsinin gələcəyinə müsbət təsir göstərəcək.