ABŞ prezidenti Donald Trampın xarici ticarət siyasətində yeni addımlar atması və OPEC+ qərarları fonunda cümə günü neft qiymətləri 2021-ci ildən bəri ən aşağı səviyyəyə endikdən sonra bazar ertəsi günü təxminən 3% ucuzlaşıb.

Finss.az xəbər verir ki, bazar günü məlum olub ki, Səudiyyənin dövlət şirkəti olan Saudi Aramco Asiyadan olan alıcılar üçün neftin bütün növləri üzrə qiymətləri 2022-ci ilin oktyabrından bəri maksimum 2,3 dollar azaldacaq. ABŞ üçün qiymətlər bir barel üçün 0,2 dollar, Şimal-Qərbi Avropa və Aralıq dənizi ölkələrindən olan alıcılar üçün isə 0,5 dollar/barel azaldılacaq.

Bakı vaxtı ilə saat 13:45-ə Londonun ICE Futures birjasında Brent markalı neftin iyun fyuçerslərinin qiyməti bir barel üçün 63,68 dollar təşkil edir ki, bu da əvvəlki hərracların bağlanışına nisbətən 1,9 dollar (2,9%) aşağıdır.

Nyu-York əmtəə birjasının (NYMEX) elektron hərraclarında may ayı üçün WTI neftinin qiyməti bu vaxta qədər 1,88 dollar (3,03%) ucuzlaşaraq 60,11 dollar/barelə bərabər olub.