Fins.az - Taiwan Semiconductor Manufacturing Company (TSMC) Nvidia ilə Arizonadakı yeni zavodunda süni intellekt üçün nəzərdə tutulmuş Blackwell çiplərinin istehsalına dair danışıqlar aparır. 

Məlumata görə, TSMC istehsal prosesini 2025-ci ilin əvvəlində başlamağı planlaşdırır. Qeyd olunur ki, Nvidia-nın mart ayında təqdim etdiyi Blackwell çipləri hazırda TSMC-nin Tayvandakı müəssisələrində istehsal edilir. Süni intellekt və sürətli hesablama texnologiyaları ilə məşğul olan şirkətlərin bu çiplərə tələbatı yüksəkdir. Bu çiplər chatbot cavablarının yaradılması kimi tapşırıqları 30 dəfə daha sürətli yerinə yetirə bilir.

Məsələ ilə bağlı TSMC və Nvidia hər hansı şərh verməkdən imtina edib. Mənbələr isə danışıqların məxfi olduğunu bildirərək anonim qalmağa üstünlük veriblər.

Məlumatlı şəxslər bildirir ki, Apple və Advanced Micro Devices (AMD) artıq Arizonadakı zavodun müştəriləri sırasındadır. Lakin hər iki şirkət bu barədə verilən suallara cavab verməyib.