Bakı–Quba avtomobil yolunun Sumqayıt şəhərinin giriş hissəsindən Yaşma yaşayış massivinədək və Ceyranbatan qəsəbəsinin son hissəsindən başlayaraq Sumqayıt şəhərinin girişinə qədər olan ərazisində yerləşən yaşayış binalarının fasadları əsaslı təmir olunacaq.

Fins.az dövlət satınalmalarının vahid internet portalına istinadən xəbər verir ki, Sumqayıt Şəhər İcra Hakimiyyəti yanında Mənzil-Kommunal Təsərrüfatı İstehsalat Birliyi bununla bağlı hazırlıqlara başlayıb.

Məlumata görə, Sumqayıt şəhərinin giriş hissəsindən Yaşma yaşayış massivinədək yerləşən yaşayış binalarının fasadlarının əsaslı təmiri işlərini “SAFARİ” MMC həyata keçirəcək. Bu işlərin icrası üçün artıq qurumla şirkət arasında 809.999,86 AZN (809 min 999 manat 86 qəpik) dəyərində müqavilə bağlanılıb.

Qurum, həmçinin, Bakı–Quba avtomobil yolunun Ceyranbatan qəsəbəsinin son hissəsindən başlayaraq Sumqayıt şəhərinin girişinə qədər olan ərazisində yerləşən yaşayış binalarının fasadlarının əsaslı təmiri işlərini isə "M-House Construction" MMC-yə həvalə edib. Bunun üçün qurum sözügedən şirkətə 99.997,73 AZN (99 min 997 manat 73 qəpik) ödəyəcək.

Fuad Mədətov
Fins.az