Bina tikintisi sahəsində gəlir və xərclərin vergitutma məqsədilə dəqiq təsbiti üçün mexanizm müəyyənləşir.

Fins.az xəbər verir ki, bu, Vergi Məcəlləsinə təklif edilən dəyişiklikdə əks olunub.

Vergi Məcəlləsinin 130.6-cı maddəsinə əsasən, bina tikintisi ilə məşğul olan şəxslərin təqdim etdiyi yaşayış və qeyri-yaşayış sahələrinə dair gəlir və bu gəlirdən çıxılan xərclər, il ərzində görülmüş işlərə (mərhələlərə) uyğun olaraq, ƏDV-siz satış dəyərləri və həmin sahələrin tikintisi ilə bağlı çəkilən məsrəflər, o cümlədən torpaq alışı xərcləri əsasında hesablanır.

Təklif edilən dəyişikliklərə əsasən, uzunmüddətli müqavilələr üzrə gəlir və xərclərin hər hesabat ilinə düşən hissəsinin müəyyənləşdirilməsi qaydası belə tənzimlənəcək:

1. Hər bir bina üzrə çəkilən xərclər ümumi qiymətləndirilmiş xərclərlə müqayisə edilərək faktiki xərcin xüsusi çəkisi müəyyənləşdirilir.
2. Binadan satılmış yaşayış və qeyri-yaşayış sahələrinin satış dəyəri, bu nisbət əsasında vergiyə cəlb olunan gəlirə aid edilir.
3. Faktiki çəkilən xərclər gəlirdən çıxılan xərclər kimi nəzərə alınır.
    

Fuad Mədətov
Fins.az