Fins.az - Böyük ABŞ Ədalət Nazirliyinin antimonopoliya məmurları, Alphabet şirkətinin Chrome brauzerini satmasını tələb etmək məqsədilə məhkəməyə müraciət etməyi planlaşdırır. 

Nazirlik, avqust ayında Google-un axtarış sistemləri bazarını qanunsuz olaraq monopolləşdirdiyi barədə qərar qəbul etmiş hakimi, həmçinin süni intellekt və Android əməliyyat sistemi ilə bağlı tədbirlər görməyə çağıracaq. Bu addımların, Google-un reklam biznesi və süni intellekt sahəsindəki fəaliyyətlərinə təsir göstərə biləcəyi ehtimal edilir.

Ədalət Nazirliyinin əməkdaşları və işdə iştirak edən ştatlar, çərşənbə günü federal məhkəmə hakimi Amit Mehtaya məlumat bazalarının lisenziyalaşdırılmasını tələb etməyi təklif edəcəklər. Bu təkliflərin qəbul edilməsi, onlayn axtarış bazarını və süni intellekt sahəsini əhəmiyyətli şəkildə dəyişə bilər.

Google-un dünyada ən populyar veb brauzerinə sahib olması, şirkətin reklam gəlirlərinin əsas mənbəyini təşkil edir. Şirkət, qeydiyyatdan keçmiş istifadəçilərin fəaliyyətini izləyərək daha effektiv reklam hədəfləri qurur. Google, Chrome brauzerini həm də öz süni intellekt məhsulu olan Gemini-yə yönəltmək üçün istifadə edir.

Google-un tənzimləmə məsələləri üzrə vitse-prezidenti Li-En Malholland, Ədalət Nazirliyinin bu addımlarının hüquqi məsələlərdən kənara çıxdığını və istehlakçılara, proqramçılara və ABŞ-ın texnoloji liderliyinə zərər verə biləcəyini vurğulayıb.

Google-un səhmləri bazar sessiyasının sonunda 1%-dən çox düşüb, lakin ilin əvvəlindən səhmlər 25%-dən çox artıb.