Fins.az - ABŞ-ın Vaşinqton və Oreqon ştatlarında yerləşən Boeing şirkətində 2200-dən çox əməkdaşın ixtisara düşəcəyi gözlənilir.

Bu barədə Reuters agentliyi şirkətin sənədlərinə istinadən məlumat yayıb.

Reuters-in sorğu keçirdiyi mühəndislər bildiriblər ki, bu ixtisarlar nəticəsində işdə qalan əməkdaşların yükü daha da artacaq. Şirkətin təqaüdə çıxmış və sonradan podratçı kimi fəaliyyət göstərən bir əməkdaşı, özünün də ixtisar edildiyini vurğulayaraq deyib:
"Bəlkə də bu, ətrafda baxıb kimlərin heç bir iş görmədiyini, yalnız yük olduğunu görmək üçün bir fürsətdir. Boeing-də fayda verməyən çoxlu insanlar var".

Eyni zamanda, Boeing şirkəti ən çox satılan təyyarəsi olan 737 MAX modelinin istehsalını bərpa etməyə çalışır. Bu, ABŞ-ın qərb sahillərindəki 33 min işçinin iştirakı ilə keçirilən və bir neçə həftə davam edən tətil nəticəsində əksər kommersiya təyyarələrinin istehsalının dayandırılmasından sonra baş verir.