OpenAI, 2024-cü ilin sonunda 5 milyard dollar zərər gözlədiyini və 2029-cu ilə qədər 100 milyard dollar gəlir əldə etməyi planlaşdırdığını açıqlayıb.

Fins.az xəbər verir ki, bu məlumatlar, şirkətin potensial sərmayəçilərlə bölüşdüyü qeyri-public maliyyə sənədlərinə əsaslanır.

Gəlir proqnozları

OpenAI, 2024-cü il üçün 3,7 milyard dollar gəlir proqnozlaşdırır. Bu gəlirin 1 milyard dolları OpenAI-nin texnologiyalarından istifadə edən şirkətlərdən gələcək. Eyni zamanda, şirkət avqust ayında 300 milyon dollar gəlir əldə edərək, 2023-cü ilin əvvəli ilə müqayisədə 1700% artım nümayiş etdirib.

Xərclər və Zərərlər

Zərərlər, xidmətlərin fəaliyyətini dəstəkləmək, əmək haqqı ödənişləri və ofis kirayəsi kimi xərclərlə əlaqədardır. OpenAI, istifadəçi bazası artdıqca xərclərin də artacağını, bu səbəbdən 2025-ci il üçün daha çox sərmayəyə ehtiyac duyacağını düşünür.

Gələcək planlar

2025-ci il üçün 11,6 milyard dollar gəlir hədəfləyən OpenAI, 2029-cu il üçün gəlirini artırmaq məqsədilə abunə qiymətlərini qaldırmağı planlaşdırır. Hal-hazırda aylıq 20 dollar olan Plus planına 10 milyon istifadəçi abunədir. Şirkət, 2024-cü ilin sonuna qədər bu planın qiymətini 2 dollar artırmağı, "növbəti beş il" ərzində isə 44 dollara qaldırmağı planlaşdırır.

OpenAI, sərmayəçilərlə müzakirələrini davam etdirir və 150 milyard dollar dəyərlə 6,5 milyard dollar sərmayə toplamağı hədəfləyir. Müzakirələrin gedişatına, layihədən ayrılan üç yüksək vəzifəli əməkdaşın təsir edəcəyi gözlənilir.