2024-cü ilin avqust ayında Çindən Rusiyaya pivə tədarükü ötən ilin eyni dövrü ilə müqayisədə təxminən iki dəfə artaraq 3,2 milyon dollara çatıb.

Fins.az xəbər verir ki, bu göstərici iyul ayına nisbətən 8,7% çoxdur və keçən ilin avqustunda qeydə alınan rəqəmləri 1,7 dəfə üstələyir. 2024-cü ilin ilk səkkiz ayı ərzində Rusiya Çindən ümumilikdə 17,9 milyon dollarlıq pivə idxal edib ki, bu da 2023-cü ilin eyni dövrü ilə müqayisədə 1,8 dəfə çoxdur.

Avqust ayında Rusiya Çindən pivə idxal edən ölkələr arasında üçüncü yeri tutub. Bu sırada birinci yerdə Avstraliya (3,64 milyon dollar), ikinci yerdə isə Honq Konq (3,58 milyon dollar) qərarlaşıb. Çin pivəsinin ümumi ixracı isə həmin ayda 39,9 milyon dollar olub.

Bu göstəricilər iki ölkə arasında artan ticarət əlaqələrinin və Çinin pivə bazarında qlobal mövqeyinin güclənməsinin göstəricisidir.