Süni intellekt (Sİ) son bir neçə ildə biznes dünyasında əhəmiyyətli bir trendə çevrilib. Ernst Young konsaltinq şirkətinin araşdırmasına görə, müştəri şirkətlərin 95%-i artıq Sİ-yə investisiya qoyur. Bu investisiyalar müsbət nəticələr gətirib: 77% şirkət əməliyyat proseslərini, 74% işçilərin məhsuldarlığını, 72% isə müştəri məmnuniyyətini artırıb.

Fins.az xəbər verir ki, süni intellekt, maliyyə xidmətlərindən səhiyyəyə qədər müxtəlif sahələrdə tətbiq olunur. O, rəqiblərin məlumatlarını toplayır, istifadəçi davranışına uyğun məzmun təqdim edir, tapşırıqları bölüşdürür, CV-ləri analiz edir, brend haqqında qeyd olunmaları izləyir, tələbi proqnozlaşdırır və riskləri xəbərdar edir.

McKinsey araşdırma şirkətinin proqnozuna görə, 2030-cu ilə qədər şirkətlərin 70%-i süni intellektdən istifadə edəcək. Şirkətlər böyük məlumat axınlarını emal etmək, logistikanı optimallaşdırmaq və istehlakçı davranışını öyrənmək məqsədilə Sİ-dən istifadə edirlər.

Süni intellektə olan maraq sürətlə artır. Bu maraq, bizneslərin böyük miqdarda məlumatı emal etməyə və müştəri təcrübəsini yaxşılaşdırmağa olan ehtiyacından qaynaqlanır. 2025-ci ildə süni intellekti daha çox prosesə inteqrasiya edə biləcək şirkətlər bazarda fərqlənəcək. Şirkətlər yalnız Sİ tapşırıqları yerinə yetirməklə kifayətlənməməli, həm də yenilik mədəniyyətini inkişaf etdirməlidir.

Yeniliklərə uyğunlaşmaq üçün:

• Şirkətinizdə süni intellekti hansı proseslərdə istifadə edə biləcəyinizi qiymətləndirin.
• İşçilərinizi Sİ ilə işləmək üzrə təlimləndirin.
• Süni intellekt sahəsindəki ən son trend və araşdırmaları izləyin.

Bu yanaşma, şirkətlərin müasir bazar tələblərinə uyğunlaşaraq rəqabət qabiliyyətini artırmağa kömək edəcək.