Technovate şirkəti dünyanın hər yerindən startapları bir araya gətirən ən prestijli qlobal startap yarışması olan “Startaplar üzrə Dünya Çempionatı”nı Azərbaycana gətirir.

Şirkətdən Fins.az-a verilən məlumata görə, çempionatda yerli və regional startaplar qlobal nüfuz əldə etmək və yekunda 1 milyon ABŞ dolları qazanmaq üçün mübarizə aparacaqlar.

Technovate şirkətinin rəhbəri Fərid İsmayılzadə tərəfindən Startaplar üzrə Dünya Çempionatının (“Starup World Cup” (SWC)) Azərbaycanda keçirilməsinə dair  SWC və “Pegasus Tech Ventures” ilə anlaşma memorandumu imzalanıb.

Memoranduma əsasən SWC-nin 2024-cü il üzrə qlobal startap yarışmasının regional mərhələlərindən biri cari ilin sentyabr ayında ilk dəfə olaraq Azərbaycanda keçiriləcək.

Qeyd edək ki, Startaplar üzrə Dünya Çempionatı  (SWC)  “Pegasus Tech Ventures” tərəfindən keçirilən, innovasiya və sahibkarlığı dəstəkləyən və əsasən investisiya mükafatı qazanmaq, potensial investorlar, mentorlar və tərəfdaşlarla tanış olmaq şansı uğrunda yarışmaq üçün dünyanın hər yerindən startapları bir araya gətirən qlobal bir yarışdır.

Müsabiqədə yerli və müxtəlif ölkələrdən olan startaplar öz biznes ideyalarını və hazırladıqları məhsulları münsiflərin qarşısında təqdim edəcəklər. Regional mərhələdə uğurlu olan startaplar ABŞ-ın San-Fransisko şəhərində keçiriləcək müsabiqənin final mərhələsində yekun mükafat olan 1 milyon ABŞ dollarını qazanmaq üçün yarışacaqlar. Final mərhələsində iştirak edəcək startaplar bir sıra nəhəng şirkətlərin qurucuları və eləcə də qlobal ekosistem oyunçuları ilə tanış olmaq, beynəlxalq arenada öz biznes ideyaları ilə çıxış edərək nüfuz qazanmaq və xarici investorları cəlb etmək kimi imkanlar əldə edəcəklər.

Qeyd edək ki, müsabiqədə iştirak tamamilə ödənişsizdir və müsabiqənin final mərhələsinə vəsiqə qazanmış startapların ABŞ-a səyahət və digər bütün xərcləri məhz Technovate şirkəti tərəfindən tamamilə qarşılanacaqdır.

“Technovate – Sabah’’ Mələk İnvestorlar Klubu” və “Mələk İnvestorlar Məktəbi”ni təsis edərək ölkəmizdə startap ekosisteminə yeni və maraqlı imkanlar qazandıran, biznes və rəqabət mühitinin inkişafını dəstəkləyən Technovate şirkəti indi də “Pegasus Tech Ventures”in birgə əməşdaşlıq edərək dünyanın ən prestijli qlobal Startaplar üzrə Dünya Çempionatını Azərbaycana gətirərək ölkəmizdə startap və innovasiya sahələrinin yenicə formalaşdığı Azərbaycanın qlobal arenada tanınması, yerli startapların xarici platformalarda iştirakı və müxtəlif sahələrdə xarici investisiyanın cəlb edilməsinə töhfə verəcəkdir.  

Müsabiqədə iştirak şərtləri, qeydiyyat tarixi və digər məlumatlar haqqında yaxın zamanda ictimaiyyətə daha ətraflı məlumat veriləcəkdir. SWC haqqında ətraflı məlumatı www.startupworldcup.io/ saytından əldə edə bilərsiniz.

Fuad Mədətov
Fins.az