Rəqəmsal İnkişaf və Nəqliyyat Nazirliyinin tabeliyində olan “AzInTelecom” MMC yaratdığı SİMA yeni nəsil rəqəmsal imzanın fərdi sahibkarlar üçün nəzərdə tutulan həllinin kommersiya tərəfdaşı ilə ilk inteqrasiyasını yekunlaşdırıb.
Fins.az xəbər verir ki, SİMA sahibkar həlli vasitəsilə bank sektoru üzrə xidmət və məhsullarının əlçatanlığını artıran ilk maliyyə təşkilatı “Yelo Bank” olub. Rəqəmsal imzanın bankın “Yelo” mobil tətbiqinə inteqrasiyası həyata keçirilib. Artıq fərdi sahibkarlar bankın filialına getmədən SİMA ilə “Yelo” tətbiqində qeydiyyatdan keçərək özlərinin şəxsiyyətini təsdiqlədə biləcəklər. Bununla da müştərilər istənilən vaxtda və istənilən yerdən “Yelo” tətbiqində qeydiyyatdan keçərək bankın fərdi sahibkarlar üçün nəzərdə tutulan xidmət və məhsullarına giriş əldə edəcəklər.
Hazırda “Yelo Bank” ilə SİMA arasında digər xidmətlər üzrə də inteqrasiya işləri sürətlə davam edir. Tezliklə fərdi sahibkarlar SİMA ilə “Yelo” tətbiqi üzərindən bankda onlayn hesab açılması prosesini də anında həyata keçirə biləcəklər. Həmçinin bankın müştərilərinin kredit üçün müraciət edərkən sənədləri SİMA ilə imzalamaq imkanı olacaq. Növbəti mərhələ üçün nəzərdə tutulan bu iki xidmətin istifadəyə verilməsi ilə sahibkarların xidmət mərkəzlərinə getməsinə, növbələrdə gözləməsinə, fiziki olaraq kağız sənədləri imzalamasına ehtiyac qalmayacaq.
“Yelo” mobil tətbiqi daxilində hesab üzrə əməliyyatları təsdiq edən sahibkarların SİMA yeni nəsil rəqəmsal imza ilə vergi və büdcə ödənişlərini, bankdaxili və ölkədaxili valyuta mübadilələrini həyata keçirməsi planlaşdırılır.
Qeyd edək ki, SİMA mobil tətbiqində qeydiyyatdan keçib rəqəmsal imza əldə edən vətəndaşlar daha sonra VÖEN-i daxil etməklə fərdi sahibkar imza sertifikatı əldə edəcəklər. Fərdi sahibkarlar SİMA rəqəmsal imza ilə “Elektron hökumət” sisteminə daxil olan 37 portalda dövlət elektron xidmətlərinə giriş edə bilərlər. Həmçinin “ASAN Login” Vahid Giriş Sisteminə daxil olaraq “E-customs” portalında “İdxal olunan məhsulların bəyan edilməsi”, “Şəxsi hesab e-vərəqəsinə giriş”, Əmək Münasibətləri və Məşğulluq altsistemində “Əmək bildirişlərinin əlavə edilməsi”, Lisenziyalar və icazələr portalında “İcazələr və lisenziyalar üzrə müraciətlərin göndərilməsi” xidmətlərindən faydalana bilərlər. Hazırda SİMA rəqəmsal imzanın fərdi sahibkarlar üçün nəzərdə tutulan həllinin digər dövlət qurumlarının elektron sistemlərinə və portallarına inteqrasiyası ilə bağlı texniki işlər davam etdirilir.
SİMA ilə bağlı daha ətraflı məlumatı rəqəmsal imzanın rəsmi saytından və “157” “AzInTelecom” Zəng Mərkəzi ilə əlaqə saxlayaraq əldə edə bilərsiniz.
