Finss.az - ABŞ-ın əsas fond indeksləri çərşənbə axşamı günü Yaxın Şərqdə artan geosiyasi gərginlik və ölkə daxilində açıqlanan zəif makroiqtisadi göstəricilər səbəbilə kəskin şəkildə ucuzlaşıb.

Trading Economicsin məlumatına görə, investorlar ABŞ-ın İsrail və İran arasında artan münaqişəyə birbaşa cəlb olunacağı ehtimalından narahatdırlar. ABŞ prezidenti Donald Tramp “Truth Social” platformasında İranla bağlı sərt bəyanatlar verərək onların “qeyri-şərtsiz təslim olmalı” olduğunu bildirib və əlavə edib ki, “səbrimiz tükənir”.

Eyni zamanda Konqresdə ABŞ-ın İran ərazisində hərbi əməliyyatlarda iştirakına qadağa qoyan yeni təşəbbüslər irəli sürülüb.

Bununla yanaşı, iqtisadi göstəricilər də investorların əhvalını korlayıb. ABŞ Ticarət Nazirliyi bildirib ki, pərakəndə satışlar may ayında 0,9% azalıb – bu, son 4 ayda qeydə alınan ən böyük geriləmədir. Analitiklər isə 0,7%-lik azalma gözləyirdilər. Aprel ayı üzrə göstəricilər də mənfiyə yenidən nəzərdən keçirilib.

ABŞ-da sənaye istehsalı da mənfi dinamika nümayiş etdirib. Federal Ehtiyat Sistemi məlumat verib ki, may ayında sənaye istehsalı 0,2% azalıb, halbuki artım proqnozlaşdırılırdı.

Eyni zamanda, Milli Mənzil Tikinti Şirkətləri Assosiasiyasının inşaat sektorunda işgüzar əhval-ruhiyyə indeksi iyun ayında 32 bəndə düşərək 2022-ci ilin dekabrından bu yana minimum səviyyəyə enib.

Şirkət səhmlərində də ciddi dəyişikliklər baş verib. T-Mobile-ın səhmləri 4,1% ucuzlaşaraq 221,43 dollara düşüb. Bu, SoftBank Groupun 21,5 milyon səhm sataraq 4,81 milyard dollar əldə etməsi ilə əlaqələndirilir.

Eli Lilly səhmləri 2% dəyər itirib. Şirkət 1,3 milyard dollara gen terapiyası ilə məşğul olan Verve Therapeuticsi almaq barədə razılığa gəlib. Verve səhmləri isə bu xəbərlə 81,5% bahalaşıb.

Aviasiya sektorunda isə JetBlue Airways 7,9% ucuzlaşıb. Şirkət əməkdaşlarına daha zəif tələbat səbəbilə yeni qənaət tədbirləri görüləcəyini bildirib. Bu xəbər fonunda digər daşıyıcılar da dəyər itirib: United Airlines – 6,2%, Delta Air Lines – 4,3%, American Airlines – 3,1%.

Texnologiya sektorunda da itkilər müşahidə olunub:

• Apple – 1,4%

• Tesla – 3,9%

• Microsoft – 0,2%

• Adobe – 4,7%

Əvəzində, enerji sektoru səhmləri neft qiymətlərinin artımı ilə müsbət dinamika göstərib:

• Chevron – 1,9%

• Exxon Mobil – 1,4%

• Marathon Petroleum – 2%

Günün yekununda ABŞ birja indekslərində ciddi geriləmə qeydə alınıb:

• Dow Jones – 0,7% azalaraq 42215,8 bənd

• SP 500 – 0,84% azalaraq 5982,72 bənd

• Nasdaq Composite – 0,91% azalaraq 19521,09 bənd