Finss.az - Cümə günü keçirilən ticarət sessiyası nəticəsində ABŞ-ın əsas fond indeksləri inamlı artım nümayiş etdirib.

İnvestorlar ölkənin iqtisadi göstəricilərini, iri şirkətlərin hesabatlarını və Federal Ehtiyat Sisteminin rəsmilərinin çıxışlarını diqqətlə təhlil ediblər.

ABŞ Ticarət Nazirliyinin məlumatına görə, aprel ayında ölkədə tikintisinə başlanan evlərin sayı 1,6% artaraq illik ifadədə 1,361 milyon təşkil edib. Bu, mart ayı üçün dəqiqləşdirilmiş göstəricidən – 1,339 milyondan – yuxarıdır və iqtisadçıların proqnozlarından bir qədər aşağı olsa da, bazarda müsbət reaksiya doğurub.

Bununla yanaşı, Miçiqan Universitetinin ilkin hesabatına əsasən, istehlakçı etimad indeksi may ayında 52,2 bənddən 50,8 bəndə enib. Bu, son beş ay ərzində davam edən azalma tendensiyasının davamı olmaqla, 2022-ci ilin iyun ayından bəri ən aşağı səviyyədir.

Atlanta Federal Ehtiyat Bankının prezidenti Rafael Bostik çıxışında bildirib ki, ABŞ iqtisadiyyatında artım 2025-ci ildə zəifləyəcək, lakin ölkə resessiyaya uğramayacaq. Onun sözlərinə görə, ÜDM artımı bu il 0,5-1% arasında dəyişə bilər və FED-in yalnız bir dəfə faiz endirimi etməsi gözlənilir.

Digər tərəfdən, JPMorgan Chase-in rəhbəri Ceymi Deymon ABŞ iqtisadiyyatında potensial resessiya ehtimalını hələ də istisna etmədiklərini deyib. O, Çinlə ticarət münasibətlərində son yumşalmaya baxmayaraq, bazar üçün hələ də qeyri-müəyyənliklərin mövcud olduğunu bildirib.

Şirkət xəbərlərinə gəlincə:

• Charter Communications səhmləri 1,8% bahalaşıb. Şirkət rəqibi Cox Communications ilə 34,5 milyard dollarlıq birləşməni elan edib.

• Nvidia səhmləri 0,4% artıb. Soros Fund Management fondunun şirkət səhmlərini alması xəbəri bazarda müsbət qarşılanıb.

• Virgin Galactic səhmləri 43,3% yüksəlib. Şirkət ilk rübdə zərərlərini 17% azaltmaqla yanaşı, analitik proqnozları üstələyib.

• AMD səhmləri Barclays bankının müsbət qiymətləndirməsindən sonra 1,9% bahalaşıb.

• Microsoft səhmləri 0,3% artıb. Şirkət Avropada Teams olmayan Office paketini daha ucuz təklif etməyə hazır olduğunu açıqlayıb.

• Applied Materials 5,3% dəyər itirib. Gəlir artımına baxmayaraq, gələcək dövrə dair proqnozlar bazarı məyus edib.

• Citigroup səhmləri 0,3% enib. Berkshire Hathaway şirkəti bankdakı bütün paylarını satdığını açıqlayıb.

Ticarət sessiyasının nəticələrinə əsasən, əsas indekslərdə artım qeydə alınıb:

• Dow Jones Industrial Average – 0,78% artaraq 42,654.74 bənd

• SP 500 – 0,7% artaraq 5,958.38 bənd

• Nasdaq Composite – 0,52% artaraq 19,211.1 bənd