Finss.az - Bu gün Bitkoin düşüb.

Trampın kriptovalyuta ehtiyatı yaratmaq planları ətrafında yaranan müvəqqəti həvəsin tükənməsi, bazarda qiymətlərin enməsinə səbəb olub.

Kriptovalyutalara olan riskə qarşı maraq həmçinin Trampın sərt ticarət tarifləri tətbiq etməsi ilə zədələnib. ABŞ prezidenti çərşənbə axşamı, Çin, Kanada və Meksikaya qarşı yeni tariflər tətbiq edərək qlobal ticarət müharibəsinin gərginliyini artırıb. Bu da investorları daha ehtiyatlı etməyə, spekulyativ aktivlərə olan maraqlarını azaltmağa səbəb olub.

Bitkoin dörd ayın ən aşağı səviyyəsinə enib və 83 405 dollar səviyyəsində ticarət edilib. Trampın kriptovalyutalarla bağlı ehtiyat yaratma planlarına dair qeyri-müəyyənlik, investorların həvəsini demək olar ki, tamamilə sarsıdıb.

Keçən bazar günü Tramp, beş kriptovalyutanın - o cümlədən bitkoin və eterin - milli kriptovalyuta ehtiyatına daxil ediləcəyini açıqlamışdı. Ancaq prezident bu ehtiyatın necə yaradılacağı və hansı qaydalarla maliyyələşdiriləcəyi barədə konkret məlumat vermədi.

Bununla yanaşı, çərşənbə axşamı günü kriptovalyutaların qiymətləri ümumilikdə geriləyib. Ether 14% ucuzlaşaraq 2 106,28 dollara, XRP isə 16,1% azalarak 2,3597 dollar olub. Trampın ehtiyatlar üçün qeyd etdiyi digər kriptovalyutalar olan Solana və Cardano müvafiq olaraq 18,9% və 22,7% dəyər itirib.

Qlobal ticarət müharibəsinin genişlənməsi ilə əlaqədar olaraq, iqtisadiyyatla bağlı narahatlıqlar artıb və bu, kriptovalyuta bazarlarında ticarətə mənfi təsir göstərib. Yapon yeni və qızıl kimi "təhlükəsiz liman" aktivləri isə daha çox tələbat görüb.

Hazırda gözlər Trampın cümə günü Ağ Evdə keçirəcəyi ilk kripto-sammitə yönəlir. Sammitdə, kriptovalyuta bazarlarının tənzimlənməsi və gələcək siyasətləri barədə daha ətraflı məlumat veriləcəyi gözlənilir.