Finss.az - ABŞ-n investisiya şirkəti KKR, Yaponiyanın tanınmış proqram təminatı inkişaf etdiricisi Fuji Soft şirkətinin səhmlərinin alınması ilə bağlı təklifini artırıb.

Şirkət, rəqibi Bain Capital-i qabaqlamaq məqsədilə təklif etdiyi qiyməti 9,45 min yendən 9,85 min yenə qaldırıb. Bu dəyişikliklə, Fuji Soft şirkətinin ümumi qiyməti təxminən 664 milyard yen (4,28 milyard dollar) səviyyəsinə çatıb.

KKR-nın yeni təklifinə əsasən, şirkət hər bir səhmi 9,85 min yenə almağa hazırdır. Bununla yanaşı, təklifin qüvvədə olma müddəti 19 fevral 2025-ci il tarixinə qədər uzadılıb.

Bain Capital isə əvvəlcə hər bir səhmi 9,45 min yenə almağı təklif edib, lakin müəyyən şərtlər yerinə yetirildikdə qiyməti 9,6 min yenə qaldırmağı planlaşdırırdı.

Xatırladaq ki, 2024-cü ilin noyabr ayında KKR Fuji Soft-un üçdə birindən çoxunu əldə edib. Bu gün isə Fuji Soft-un səhmləri Tokio bazarında 1,9% bahalaşaraq, 9,99 min yenə satılıb.

Bu hərəkət, Fuji Soft-un səhmlərini əldə etmək üçün rəqabətin daha da artdığını və investorların şirkətin gələcək potensialını yüksək qiymətləndirdiyini göstərir.