Fins.az - Bu gün Londonda "PR London Live" adlı PR agentliyi, dünyaca məşhur bitkoinin yaradıcısının şəxsiyyətini açıqlayaraq, uzun illərdir davam edən spekulyasiyalara son qoyacağını bəyan edib.

Agentlik eksklüziv tədbirdə bitkoinin yaradıcı şəxsi kimi tanınan Satoşi Nakamotonun şəxsiyyətini ilk dəfə ictimaiyyətə təqdim etməyi planlaşdırır.

Agentliyin yaydığı mətbuat açıqlamasına görə, Nakamoto özü şəxsiyyətini açıqlamağa qərar verib. Onun sözlərinə görə, “şəxsiyyətimi rəsmi olaraq açıqlamağın vaxtı gəlib çatıb. Ciddi hüquqi problemlərlə üz-üzəyəm və dünya həqiqəti bilməyi haqq edir”. Bu sensasiyalı açıqlama, bitkoin haqqında rəsmi sənədin nəşr edilməsinin 16-cı ildönümünə həsr olunmuş xüsusi tədbirə təsadüf edir.

Tədbir bu gün Londondakı məşhur "Frontline" klubunda keçiriləcək və Satoşi olduğunu iddia edən şəxsin təqdim edəcəyi təkzibedilməz sübutlar birbaşa yayım vasitəsilə nümayiş olunacaq. Agentlik, bu sübutların Nakamotonun məhz bitkoinin yaradıcı şəxsi olduğunu “təkzibedilməz şəkildə təsdiq edəcəyini” vurğulayıb.

Bu açıqlamaya skeptik yanaşan bəzi şəxslərə cavab olaraq PR London Live, kriptocəmiyyətin illərlə davam edən mübahisələri bitirəcək tarixi bir hadisəyə şahidlik edəcəyini bildirir.

Bir neçə həftə öncə "Elektriklə Pul: Bitkoinin Sirri" adlı sənədli film də Satoşi Nakamotonun şəxsiyyətini açıqlamaq iddiası ilə gündəmə gəlmişdi. 10 oktyabrda yayımlanan filmdə Nakamotonun Piter Todd olduğu bildirilirdi. Lakin Todd bu iddiaları rədd edərək təhlükəsizlik səbəbindən gizlənməyə məcbur qalıb, çünki ona aid olduğu ehtimal edilən 1,1 milyon BTC bəzi cinayətkar qrupların diqqətini çəkə bilər.

Kripto dünyasında böyük əks-səda doğuracaq bu açıqlamanın nəticələri maraqla gözlənilir.