Fins.az - Bloomberg-in SWIFT tranzaksiya məlumatlarına əsaslanaraq verdiyi xəbərə görə, sentyabr ayında qlobal ödənişlərdə yuanın payı kəskin şəkildə azalıb.

Belə ki, Çin valyutası ilə həyata keçirilən əməliyyatların ümumi payı sentyabrda 3,6%-ə enib, bu isə əvvəlki aya nisbətən 1,1% azalma deməkdir. Qeyd edək ki, yuanın bazar payı iyul ayında rekord səviyyəyə - 4,7%-ə çatmışdı.

Mütəxəssislər yuanın qlobal ödənişlərdəki payının azalmasının əsas səbəbini dəqiq müəyyən edə bilməsələr də, ilin birinci yarısında yuan məzənnəsinə olan təzyiqin zəifləməsinin bu tendensiyaya təsir edə biləcəyini vurğulayırlar. Sentyabr ayında yuan ardıcıl üçüncü ay güclənərək qısa müddətlik 1 dollar üçün 7 yuan həddinə çatıb. Bu proses, Çin iqtisadiyyatına investor münasibətinin müsbətə doğru dəyişməsi və ölkənin iqtisadi artımı dəstəkləyən müxtəlif stimullaşdırıcı tədbirlər görməsi fonunda baş verib.

Mizuho Bank-ın Asiya valyutaları üzrə baş strateqi Ken Çeunq qeyd edib ki, yuan üzərindəki təzyiqin azalması şirkətləri yerli valyutada ödənişlərdən daha az istifadə etməyə və dollar ehtiyatlarına yönəlməyə təşviq edə bilər. Çeunq əlavə məlumat olmadan yuanın bazar payının azalmasının səbəbi və davamlılığı barədə dəqiq nəticə çıxarmağın çətin olduğunu bildirib.

Hazırda dünya bankları SWIFT sistemindən beynəlxalq valyuta əməliyyatlarını idarə etmək üçün geniş istifadə edirlər. Çin isə ABŞ-ın Rusiyaya qarşı tətbiq etdiyi sanksiyalar fonunda öz valyutasının qlobal ticarətdə daha çox istifadə olunmasına çalışır.

Australia New Zealand Banking Group-un Çin üzrə baş strateqi Zhaopeng Sina yuanın payının azalmasının, beynəlxalq investorlar arasında populyar olan borc bazarındakı svop əməliyyatlarının azalması ilə əlaqəli ola biləcəyini deyib. Sina FED-in yumşalma dövrünə başlaması və Çin hökumətinin stimullaşdırıcı tədbirlər həyata keçirməsi fonunda bu əməliyyatların azalması nəticəsində yuanın payının azaldığını bildirib. Ekspert yuanın bazar payının yaxın aylarda stabilləşəcəyini proqnozlaşdırır.