Yaponiya hökuməti fevralın 24-də Ukraynada hərbi əməliyyatların başlaması ilə əlaqədar tətbiq edilən sanksiyaların sərtləşdirilməsi çərçivəsində Rusiyadan kömür tədarükünə embarqo tətbiq etməmək qərarına gəlib.

"Fins.az"xəbər verir ki, bu barədə məlumatlı mənbələrə istinadən The Mainichi məlumat yayıb.

Nəşrin məlumatına görə, Rusiyadan Yaponiyaya idxal olunan kömürün həcmi ümumi həcmin təxminən 15%-ni təşkil edir. Yaponiya embarqodan imtina edib, ona görə ki, Rusiya malları beynəlxalq bazardan çıxarılarsa, bu enerji resursunun qiymətinin qalxması riski ola bilər.

Bundan əvvəl Avropa Komissiyası Rusiyaya qarşı beşinci sanksiyalar paketini təqdim edib. Buraya kömür idxalına qadağa, dörd banka qarşı məhdudiyyətlər, həmçinin nəqliyyat sektorunda qadağalar daxildir.

Britaniya Xarici İşlər Nazirliyinin rəhbəri bildirib ki, ölkə Rusiyadan gələn banklara qarşı yeni tədbirlər üzərində G7-dəki tərəfdaş ölkələrlə işləyir.