ABŞ-ın ən böyük kriptovalyuta birjası, Bitcoin, Ether və digər aparıcı kriptovalyutaların ən böyük ticarətçilərindən biri olan Coinbase Global Inc. Bitcoinin yaradılmasından 12 il sonra ilk dəfə olaraq dünən səhmlərinin açıq satışı üçün Nasdaq birjasında birbaşa listinqə çıxıb.
Fins.az xəbər verir ki, indiyə qədər birbaşa listinq keçirməyərək, əsasən IPO-lara (Səhmlərin İlkin Kütləvi Yerləşdirilməsi) ev sahibliyi edən Nasdaq üçün də bir ilk olan prosesdə əvvəlcə bir səhm üçün 250 dollar qiymət təklifi nəzərdə tutulsa da, birjalar açılan kimi ilkin qiymət 381 dollar olaraq müəyyənləşib. Bununla da, Coinbase səhm bazarı investorları tərəfindən 75,9 milyard dollar həcmində qiymətləndirilib. Prosesdə Coinbase-in əsas məsləhətçiləri Goldman Sachs, JPMorgan, AllenCo və Citigroup-dur.
Səhm bazarına daxil olan kimi öz sözünü deyən Coinbase əldə etdiyi bazar dəyəri ilə Nyu-York Birjasının ana şirkəti, 67 milyard dollar həcmində qiymətləndirilən ICE-ni (Intercontinental Exchange Inc.) üstələyib. Əgər Coinbase opsiyalar və birjalar üçün səciyyəvi olan digər variantlar da daxil olmaqla 100 milyard dollar kapitallaşmaya çatsa, daha bir rekord qıraraq ABŞ-ın ən dəyərli 85 şirkətindən biri olacaqdır. Listinq, Coinbase-in həmtəsisçisi və baş direktoru Brayan Armstronqu açılış qiymətində 15,1 milyard dəyərində səhmlə multimilyarder olaraq rəsmiləşdirib.
2012-ci ildə kriptovalyuta mübadilə platforması kimi qurulan Coinbase artıq 2021-ci ilin martında kommersiya əməliyyatlarının həcminə görə ABŞ-ın ən iri kriptovalyuta birjasına çevrilib. 56 milyon pərakəndə müştərinin aktivlərini saxlayan və idarə edən, 2020-ci ilin sonuna gəlirləri 1 milyard dolları keçən Coinbase xüsusilə də iki əsas kriptovalyuta – Bitcoin və Etherin fantastik sürətlə bahalaşması sayəsində görünməmiş dəyər qazanıb. Hazırda Bitcoin 63 400 dollara, Ether isə tarixindəki rekord qiymətə - 2 400 dollara satılır.
Bitcoin dəstəkləyiciləri Coinbase-in birjalara çıxmasını dünya maliyyə sisteminə yeni texnologiyaların transferi kimi qiymətləndirsə də, ABŞ Mərkəzi Bankının (Fed) sədri Cerom Pauell kriptovalyutaları “spekulyasiya alətləri” adlandıraraq, Bitcoin və Ether həvəskarlarının kefini pozub: “Heç kim onlardan real ödəniş vasitəsi kimi istifadə etmir, bunlar sadəcə qiyməti qaldırmaq üçün bir mərc alətidir. Təbiətinə görə bir qədər də qızıla bənzəyir. Bəşəriyyət min illər boyu qızıla əslində sənayedə bir metal kimi çata bilmədiyi xüsusi dəyəri verərək, onu qiymətə mindirib. Bitcoin də daha çox ona bənzəyir”.