Bazar ertəsi kriptovalyuta bazar kapitallaşması bütün dövrlərdə ən rekord həddə - 2 trilyon dollara çatıb.

Marja xəbər verir ki, kriptovalyuta məlumatları və bazar şərtlərinin izləyicisi CoinGecko və Blockfolio son aylarda bu sahədəki gəlirlərin həm institusional, həm də pərakəndə nvestorların iri miqyaslı marağını cəlb etdiyini açıqlayıb.

Mart ayında indiyə qədərki ən böyük rekordu olan 61 min dolları keçən Bitkoin hazırda 59 min dollardan təklif edilir. Analitiklər qiymətin 53 min dollardan yuxarıda qaldığı müddətdə Bitkoinin 1 trilyon dollarlıq bazar kapitallaşmasını saxlayacağını bildirirlər. Bazarda həcminə və qiymətinə görə ikinci böyük kriptovalyuta olan Ethereum 1,3% artaraq, 2103 dollardan satılır. Onun bazar kapitallaşması dünən 244 milyard dollara çatıb.

Kriptovalyuta birjası Bitfinex-in baş texnologiya direktoru Paolo Ardoino Bitkoin və Ethereuma marağın həddən artıq böyük olduğunu qeyd edib: “Bu sənaye yetkinləşdikcə, biz daha çox blokçeyn əsaslı tətbiqetmələrin bazar çıxacağını gözləyirik. Bu isə alternativ aktivlərin meydana gəlməsi deməkdir”.

Blokçeyn məlumatlarının provayderi Glassnode şirkəti isə Bitkoinin bir həftədən çoxdur  1 trilyon bazar kapitallaşmasını qoruyub saxlaya bilməsini bütövlükdə kriptovalyuta aktivlərinə inamın göstəricisi kimi xarakterizə edib.

Bitkoin ilin əvvəlindən 100%, Ethereum isə 190% dəyər qazanıb. Kriptovalyuta bazarının bu qədər sürətlə böyüməsinin səbəbi bir çox iri korporasiyaların, o cümlədən texnologiya nəhəngi Teslanın və ABŞ bankı BNY Mellonun bu sahəyə ciddi yatırımlar etməyə başlamasıdır. 35 milyard dollarlıq açıq investisiya fondu və ən çox bitkoin saxlayanlardan biri Grayscale Bitcoin Trust isə tezliklə birjalarda satışlara başlayacaq fonda çevrilməyi planlaşdırır.