Finss.az - Avropa Mərkəzi Bankının (AMB) İdarə Heyətinin üzvü və Latviya Mərkəzi Bankının rəhbəri Martins Kazaksın açıqlamalarına əsasən, Avrozonada faiz dərəcələri artıq son həddə yaxınlaşa bilər.

Bununla belə, davam edən ticarət qeyri-müəyyənliyi borclanma xərclərinin gələcək trayektoriyasını dəyişə bilər.

CNBC telekanalına verdiyi müsahibədə Kazaks bildirib ki, əgər inflyasiya AMB-nin əsas ssenarisinə uyğun olaraq 2% ətrafında sabit qalarsa, Mərkəzi Bank hazırda "nisbətən son faiz dərəcəsinə yaxın" mövqedədir. Bununla yanaşı, o qeyd edib ki, "bir neçə faiz azaldılması" hələ də gündəmdə qala bilər və proseslərin gedişatı əsasən beynəlxalq ticarət danışıqlarından asılı olacaq.

AMB-nin aprel ayındakı son iclasında depozit faiz dərəcəsi 25 baza bəndi azaldılaraq 2,25%-ə endirilib. Bu, son bir ildə baş verən yeddinci faiz azaldılması olub. Refinans əməliyyatları üzrə dərəcə 2,40%-ə, marjinal kredit dərəcəsi isə 2,65%-ə düşüb.

Bununla yanaşı, Avrozonanın iqtisadiyyatı qlobal təzyiqlərə qarşı daha dayanıqlı hesab edilsə də, ticarət mübahisələri səbəbindən artım perspektivləri zəifləyib. Analitiklərə görə, hazırda investorlar AMB-nin 5 iyun tarixində yenidən faiz endirimlərinə gedəcəyini 90% ehtimalla gözləyirlər. İl sonuna qədər depozit faizinin 1,75%-ə qədər enməsi istisna olunmur.