Fins.az - 2024-cü ilin yanvar-noyabr aylarında Azərbaycandakı bankların faiz və onunla bağlı xərcləri 1 milyard manatı keçib.

Bankların depozitlər üzrə faiz xərcləri isə ötən ilin eyni dövrü ilə müqayisədə əhəmiyyətli dərəcədə artaraq 813,4 milyon manata çatıb.

2024-cü ilin 11 ayında Azərbaycandakı bankların cəmi faiz xərcləri 1 milyard 91,2 milyon manat təşkil edib. Bu məbləğin 813,4 milyon manatı depozitlər üzrə ödənilmiş faizlərdən ibarətdir. Ən böyük faiz xərcləri isə müddətli əmanətlər üzrə ödənilən faizlərdən qaynaqlanıb. 2023-cü ilin eyni dövrü ilə müqayisədə faiz xərcləri 2024-cü ildə 335,5 milyon manat artıb. 2023-cü ilin 11 ayında isə bankların faiz xərcləri 755,7 milyon manat olmuşdu, o cümlədən depozitlər üzrə faiz xərcləri 536,5 milyon manat təşkil etmişdi.

Banklar son aylarda depozitlər üzrə faizləri artırıblar. Bu artım, həmçinin əmanətlərin cəlb olunmasına yönəlmiş bir təşəbbüs kimi qiymətləndirilir. İqtisadçılar, faizlərin artımını, inflyasiya və iqtisadi şərtlərin dəyişməsi ilə əlaqələndirirlər. Müddətli əmanətlərə olan marağın artması, bankların daha yüksək faizlər təqdim etməsini təşviq edib.