“SP Global Ratings” beynəlxalq reytinq agentliyi, mümkün Rusiya-Ukrayna sülh müqaviləsinin Mərkəzi Asiya və Cənubi Qafqazın iqtisadiyyatlarına təsiri ilə bağlı proqnozunu açıqlayıb.

Finss.az bu barədə reytinq agentliyinə istinadən xəbər verir ki, atəşkəsdən sonra bu bölgələrə miqrantların, investisiyaların və kapitalın dərhal və əhəmiyyətli şəkildə axını ehtimal olunmur. Bu isə iqtisadi dəyişkənliyi məhdudlaşdırmalıdır.

“SP” hesab edir ki, iqtisadi artım tendensiyası aşağı səviyyədə olsa da, müsbət istiqamətdə davam edəcək. Miqrantların və iş adamlarının Mərkəzi Asiya və Cənubi Qafqaza gəlişi xüsusilə İKT, logistika, maliyyə xidmətləri, turizm və ticarət sahələrində inkişafı sürətləndirib. Məsələn, 2022-ci ildən bəri Gürcüstanda Rusiya vətəndaşlarına aid minlərlə yeni biznes qeydiyyatdan keçib, Qazaxıstanda isə Rusiya mənşəli şirkətlərin İKT sektorunda sayı yeddi dəfə artıb.

Reytinq agentliyi əlavə edib ki, atəşkəs ssenarisində belə, bir çox biznesin xaricdə fəaliyyətini davam etdirəcəyi gözlənilir. Bu, geosiyasi qeyri-müəyyənlik və Rusiya ilə qonşu ölkələr arasında siyasi və iqtisadi əlaqələrin davam etməsi ilə əlaqədardır.

SP mövcud iqtisadi artım proqnozlarını artıq 2022-ci ilin yüksək artım tempindən normal hala keçidi əks etdirən bir göstərici kimi qiymətləndirib. 2025-2027-ci illərdə Cənubi Qafqaz və Mərkəzi Asiyada real ÜDM artımının 2022-2024-cü illərlə müqayisədə yavaşlayacağı gözlənilir. Məsələn, Gürcüstan və Ermənistanın iqtisadi artımı 2022-2024-cü illərdə müvafiq olaraq 9,4% və 8,8% olduğu halda, növbəti üç ildə bu artım təxminən yarıya enəcək, amma yenə də möhkəm qalacaq.

Sonda qeyd edilib ki, “SP” 2025-2027-ci illərdə Azərbaycanın real iqtisadi artımını 2% səviyyəsində proqnozlaşdırır.