Fins.az xəbər verir ki, Avrasiya İnkişaf Bankının (AİB) İdarə Heyətinin sədri Nikolay Podquzov, Qazaxıstanın Almatı şəhərində keçirilən “Mərkəzi Asiyada tərəfdaşlıq: qlobal çağırışlara lokal problemlərin prizmasından baxış” sessiyasındakı çıxışında inkişaf institutlarının böyük infrastruktur layihələri üçün maliyyə resurslarını birgə səfərbər etməsinin vacibliyini vurğulayıb. Onun sözlərinə görə, Asiya-Sakit Okean regionunda dayanıqlı gələcək üçün su elektrik stansiyaları, yollar və zavodlar kimi iri layihələrə ehtiyac var, lakin heç bir maliyyə institutu milyardlarla dollarlıq layihələri təkbaşına maliyyələşdirməyəcək.

Podquzov, inkişaf institutlarının əməkdaşlıq üçün 7 əsas istiqamət müəyyən etdiyini bildirib: kapitalın səfərbər edilməsi, kapital bazarlarında vəsait cəlb edilməsi, yerli valyutada maliyyələşdirmə, layihə ekspertizasının mübadiləsi, birgə tədqiqatlar, texniki yardım və transsərhəd layihələrin birgə icrası. O, çoxtərəfli inkişaf banklarını və beynəlxalq təşkilatları birgə işləməyə çağırıb və Mərkəzi Asiyanın inkişafı ilə bağlı səylərin region ölkələrindəki insanların həyat səviyyəsini yaxşılaşdırmağa yönəldiyini qeyd edib.