"Fitch Solutions"un (FS) hesabatına görə, son on ildə Azərbaycanda inflyasiya orta hesabla 5,5% təşkil edib və qarşıdakı 10 ildə bu göstəricinin orta hesabla 5,0% olacağı gözlənilir.

Fins.az xəbər verir ki, bu barədə "Fitch Group"a aid olan "Fitch Solutions” (FS) şirkətinin ölkə üzrə hesabatında bildirilib.

Rusiya-Ukrayna müharibəsi və ərzaq qiymətlərinin artması səbəbindən inflyasiya tarixi yüksək səviyyəyə çatmışdı. Bu, Azərbaycanın tədarük zəncirlərinin pozulması ilə nəticələnib. Lakin FS hesab edir ki, növbəti illərdə qiymət artımları tədricən azalacaq.

Hesabata əsasən, Azərbaycan Mərkəzi Bankı (AMB) inflyasiya hədəfini 2-6% aralığında saxlayır və qiymət sabitliyini əsasən məzənnəyə nəzarət vasitəsilə təmin edir. FS vurğulayır ki, AMB, xüsusən 2015-ci il devalvasiyasından sonra inflyasiyanı daha yaxşı idarə edir. Bununla belə, bank sektorunda yüksək dollarlaşma səviyyəsi (bank əmanətlərinin 48,4%-i xarici valyutada saxlanılır) pul siyasətinin effektivliyini azaldır və inflyasiyanın qalıcı xarakter almasına səbəb ola bilər.

Mərkəzi Bankın 2026-cı ilə qədər inflyasiya hədəfli pul siyasətinə keçidi nəzərdə tutan planı, manatın valyuta bazarında daha sərbəst ticarətinə imkan yaradacaq. Bu islahatlar yerli valyutanın sabitliyini və iqtisadi sistemin davamlılığını gücləndirməyi hədəfləyir.

Uzunmüddətli proqnozlara görə, inflyasiyanın yenidən trend səviyyəsinə qayıdacağı gözlənilir, bu isə iqtisadiyyatın daha dayanıqlı olmasını təmin edə bilər. Lakin pul siyasətinin effektivliyinin artırılması üçün dollarlaşmanın səviyyəsinin azaldılması və struktur islahatların davam etdirilməsi zəruridir.