Bu ilin yanvar-fevral aylarında Azərbaycanda debet və kredit kartları vasitəsilə 1,211 mlrd. manat həcmində nağdsız ödənişlər həyata keçirilib.

Azərbaycan Mərkəzi Bankının (AMB) məlumatları əsasında aparılmış hesablamalarına görə, bu, ötən ilin eyni dövrü ilə müqayisədə 45,6% çoxdur.

Sözügedən nağdsız ödənişlərin 72 mln. manatı ATM-lər vasitəsilə, 473 mln. manatı POS-terminallar vasitəsilə, 666 mln. manatı isə elektron ticarət vasitəsilə həyata keçirilib.

Kredit və debet kartları ilə aparılan əməliyyatların həcmi açıqlanıb

Bu ilin fevral ayında Azərbaycanda dövriyyədə olan kredit və debet kartları ilə 2,595 mlrd. manat həcmində əməliyyatlar həyata keçirilib. Bu göstərici 2021-ci ilin yanvar ayı ilə müqayisədə 16%, ötən ilin fevral ayı ilə müqayisədə isə 17,1% artıb.

Kredit kartlarına gəldikdə, fevral ayında ölkədə bu kartlar ilə 157 mln. manatlıq əməliyyatlar həyata keçirilib ki, bu da aylıq ifadədə 4,7%, illik müqayisədə isə 6,8% çoxdur. Sözügedən əməliyyatların 145 mln. manatı ölkə daxilində, qalan 12 mln. manatı isə ölkə xaricində həyata keçirilib.

Debet kartları ilə isə fevralda 2,437 mlrd. manatlıq əməliyyatlar aparılıb ki, bu da aylıq müqayisədə 16,8%, illik müqayisədə isə 17,8% çoxdur. Sözügedən əməliyyatların 2,328 mlrd. manatlıq hissəsi ölkə daxilində, qalan 109 mln. manatı isə ölkə xaricində həyata keçirilib.

Qeyd edək ki, 2021-ci ilin martın 1-nə Azərbaycanda dövriyyədə 8,458 mln. ədəd debet kartı və 1,121 mln. ədəd isə kredit kartı var. Beləliklə son bir ildə debet kartlarının sayı 21,8%, kredit kartlarının sayı isə 26% artıb.

(c)APA